Read Biblia SEPT Tobías 7 Bible Online

Tobías 7 - Biblia SEPT bible

Tobías 7

¹O entraren en Ecbátana, dixo Tobías: —"Azarías, meu irmán, lévame dereitiño á casa do noso irmán Reuel". O anxo conduciuno á casa de Reuel. Encontrárono sentado diante da porta do patio e adiantáronse a saudalo. El díxolles: —"Saúde, irmáns, sexades benvidos". E fíxoos entrar na súa casa.

²Díxolle á súa muller Édnah: —"Canto se semella ese mozo ó meu irmán Tobit!"

³Édnah preguntoulles: —"De onde sodes, irmáns?" Contestaron: —"Da casa dos fillos de Naftalí, deportados a Nínive".

⁴Ela dixo entón: —"Coñecedes o noso irmán Tobit?" Responderon: —"Si que o coñecemos". E ela de novo: —"Como está?" Responderon:

⁵—"Moi ben; aínda vive". E Tobías engadiu: —"É o meu pai".

⁶Reuel levantouse dun brinco e abrazouse a el chorando. Logo falou e díxolle: —"Sexas benvido, fillo. Tes un pai excelente. Que mágoa que un home tan bo, que facía tantas esmolas, quedase cego!" E botándose ó pescozo do seu irmán Tobías, volveu chorar.

⁷A súa muller Édnah chorou tamén por Tobit, e a súa filla Sárah tamén empezou a chorar.

⁸Despois matou un carneiro do rabaño e recibiunos con moito amor.

⁹Lavados xa e bañados, cando se foron sentar á mesa, Tobías dixo a Rafael: —"Irmán Azarías, pregúntalle a Reuel se me dá a miña irmá, Sárah".

¹⁰Reuel oíu isto e díxolle ó mozo: —"Come, bebe e aproveita a tarde, pois non lle corresponde a ninguén máis ca a ti, irmán, casar coa miña filla, Sárah, nin eu podo darlla a outro que non sexas ti, pois es o parente máis próximo. Con todo, meu fillo, vouche dicir toda a verdade.

¹¹Xa llela dei a sete homes de entre os nosos parentes, e todos morreron a noite mesma que ían con ela. Pero agora come, fillo, e bebe e o Señor intervirá no teu favor". Mais Tobías dixo: —"Non comerei bocado nin beberei aquí cousa ningunha mentres non resolvas este asunto". Reuel díxolle: —"Moi ben, vouno facer. Xa que ela che pertence segundo a decisión do libro de Moisés; é o ceo quen decide que cha dea. Recibe, pois, a túa irmá. A partir deste momento, ti es o seu irmán e ela a túa irmá. Entrégocha a partir de hoxe e para sempre. O Señor do ceo fará que esta noite sexa boa para ámbolos dous, fillo. Que vos manifeste a súa misericordia e a súa paz".

¹²Reuel chamou entón a Sárah, ela veu onda el. Tomándoa pola man, entregoulla a Tobías dicindo: —"Recíbea segundo a Lei e segundo a decisión consignada no libro de Moisés, que cha dá por muller. Tómaa e lévaa sen medo a teu pai. Que o Deus do ceo vos conduza en paz".

¹³Despois chamou á nai de Sárah e mandoulle traer con que escribir. E redactou o documento do contrato de matrimonio, no que se consignaba que lla daba por muller segundo a decisión da Lei de Moisés.

¹⁴Só entón comezaron a comer e beber.

¹⁵Reuel chamou á súa muller Édnah e díxolle: —"Irmá miña, prepara a outra habitación e leva a ela a Sárah".

¹⁶Édnah foi preparar un leito na habitación, como el lle mandara. Levouna e botouse a chorar por ela; despois limpou as bágoas e díxolle:

¹⁷—"Moito ánimo, filla, que o Deus do ceo cambie en ledicia o teu pesar". E saíu.