Read Biblia SEPT Xudit 1 Bible Online

Xudit 1 - Biblia SEPT bible

Xudit 1

¹No ano doce do reino de Nabucodonosor, que reinou sobre os asirios na gran cidade de Nínive; no tempo de Arfaxad, que reinou sobre os medos en Ecbátana,

²e constrúe arredor de Ecbátana un muro de pedras talladas de tres cóbados de ancho e de seis cóbados de longo, dándolle ó muro unha altura de setenta cóbados e cincuenta de ancho.

³Levantou tamén onda as portas torres de cen cóbados de alto e sesenta de ancho nos seus alicerces.

⁴Construíu tamén portas que tiñan setenta cóbados de alto e corenta de ancho, para facilitar a saída das poderosas forzas e para que os seus infantes puidesen desfilar ordenadamente.

⁵Neste tempo, pois, o rei Nabucodonosor declaroulle a guerra ó rei Arfaxad na gran chaira chamada Ragau.

⁶Xuntáronselle todos cantos vivían nas montañas, os que moraban cerca do Éufrates, do Tigris, do Hidaspes, e nas chairas de Arioc, rei de Elam, para combateren ós fillos de Xeleud. Uníronse, pois, moitos pobos.

⁷Nabucodonosor, rei dos asirios, despois disto mandou mensaxeiros a todos os habitantes de Persia, a todos os que moraban nas rexións occidentais, a todos os de Cilicia e Damasco, ó Líbano e Antilíbano, ós situados nas rexións marítimas,

⁸A todos os pobos do Carmelo e de Galaad, da alta Galilea, e da gran chaira de Esdrelón;

⁹A todos os de Samaría e das súas vilas; ós do outro lado do Xordán, ata Xerusalén; na Batanea, Ielús e Cadex; cara ó río de Exipto, Tafnes, Rameses, e toda a terra de Goxén,

¹⁰Ata por enriba de Tanis e de Menfis; e a todos os habitantes de Exipto ata os confíns da Etiopía.

¹¹Mais as xentes de todas estas terras riron co mandado de Nabucodonosor, rei dos asirios, e non quixeron saír canda el para a guerra; pois non lle tiñan ningún medo, xa que ós seus ollos era un home coma eles. Despediron os seus enviados sen acordaren nada e sen lles faceren honra ningunha.

¹²Entón Nabucodonosor montou en cólera contra todas esas rexións e xurou polo seu trono e polo seu imperio que se vingaría coa súa espada de todos os habitantes do país de Moab, dos fillos de Amón, de toda a Xudea e de todos cantos estaban esparexidos polo Exipto ata o litoral dos dous mares.

¹³Marchou co seu exército contra o rei Arfaxad, no ano dezasete do seu reino. Venceuno no combate e puxo en fuga todo o poder de Arfaxad e toda a súa cabalería, e todos os seus carros.

¹⁴E apoderouse das súas cidades, chegando ata Ecbátana, tomando as súas torres e devastando as súas rúas, e convertendo en ludibrio a súa fermosura.

¹⁵Apresou a Arfaxad nas montañas de Ragau e atravesouno coas súas propias armas, acabando con el ese día.

¹⁶Retornou Nabucodonosor a Nínive con todo o seu exército e con cantos se lle foran xuntando, unha multitude innumerable de guerreiros, e repousou alí durante cento vinte días, xunto co seu exército, dándose á boa vida.