Read Biblia SEPT Xudit 11 Bible Online

Xudit 11 - Biblia SEPT bible

Xudit 11

¹Holofernes díxolle: —"Animo, muller, non temas: eu nunca lle fixen mal a ninguén que estea disposto a servir a Nabucodonosor, o rei de toda a terra.

²Tampouco non levantaría a lanza contra o teu pobo que habita na montaña, se non se desen ó desprezo: foron eles mesmos os que carrexaron estes males.

³Agora, pois, dime por que razón escapaches deles para vires a nós. Salvaches a vida esta noite e no sucesivo.

⁴Ninguén ousará facerche mal, senón que serás tratada coma o resto dos servidores de Nabucodonosor, o meu rei e señor".

⁵Xudit respondeulle: —"Acolle as palabras da túa serva, permitíndome falar na túa presenza. Non lle mentirei ó meu señor esta noite.

⁶Se fas caso de canto che vai dicir a túa escrava, Deus levará o asunto a bo termo e non fracasará o meu señor na súa empresa.

⁷Pois, pola vida de Nabucodonosor, rei de toda a terra, e polo poder de quen te enviou para endereitar a toda alma vivente, que non só os homes lle serán sometidos, senón que tamén os animais domésticos, e as feras, e as aves do ceo, estarán baixo o dominio de Nabucodonosor e da súa casa.

⁸En efecto, chegou ata nós a sona da túa sabedoría e gran intelixencia, e divulgouse na nosa terra que ti es o mellor home de todo o reino, poderoso pola túa ciencia e admirable na maneira de levar a guerra.

⁹Chegou ata nós o discurso que Ahicar pronunciou no teu consello e oímos as súas palabras, xa que a xente de Betulia o colleu prisioneiro, e el comunicoulles todo canto falara na túa presenza.

¹⁰Referente a iso, señor e mestre soberano, non despreces as súas palabras, antes gárdaas moi dentro do teu corazón, pois canto dixo é moi certo: a nosa raza non pode ser ferida e a espada non ten ningunha forza contra ela, se eles non pecaron contra o seu Deus.

¹¹Agora precisamente, para que o meu señor non falle o golpe, antes ben a morte caia sobre eles, deixáronse enredar nun crime polo que o seu Deus se alporizará, unha vez cometida esa tolemia.

¹²Como xa lles faltan os víveres e a auga, teñen o propósito de botar man ós animais domésticos, e están dispostos a consumir incluso o que Deus polas súas leis lles prohibiu comer.

¹³Decidiron tamén consumir as primicias do trigo, os décimos do viño e do aceite, que, como cousas santas, se reservan para os sacerdotes que asisten en Xerusalén na presenza do noso Deus, e que ningún leigo pode nin tocar coa man.

¹⁴Enviaron mensaxeiros a Xerusalén, e os seus moradores fixeron o mesmo, para pediren permiso ó Consello dos Anciáns.

¹⁵Cando o obteñan e o realicen, nese mesmo momento seranche entregados para a súa ruína.

¹⁶É por isto polo que a túa serva fuxiu deles, sabedora de todas esas cousas. Deus envioume para que realice en ti cousas das que se pasmarán todos os que as saiban en toda a terra.

¹⁷Pois a túa serva é piadosa e serve ó Deus do ceo día e noite. Quixera, polo tanto, ficar ó teu lado, meu señor, e a túa escrava sairá pola noite para ir ó val, onde pregará a Deus e el dirame cando eles terán cometido o seu pecado.

¹⁸Eu virei dicircho e entón ti sairás con todo o teu exército, e non haberá nin un só home de entre eles que poida resistir.

¹⁹Eu mesma te guiarei polo medio da Xudea, ata chegar diante de Xerusalén e porei o voso asento no medio desta cidade, e conduciralos coma ovellas sen pastor. Nin sequera un can ladrará contra ti. Pois díxoseme todo isto a través dun coñecemento que se me deu das cousas futuras. Isto foime anunciado, e fun enviada para comunicarcho".

²⁰Moito lles gustaron estas verbas a Holofernes e ós seus oficiais, que, admirados da súa sabedoría, comentaron:

²¹—"Dun extremo ó outro da terra non hai muller semellante, nin pola beleza do seu rostro, nin pola intelixencia que sae de canto di".

²²Holofernes díxolle: —"Que ben fixo Deus ó mandarte diante do teu pobo e traerte aquí, para que o poder estea nas nosas mans, e caia a ruína sobre cantos se mofan do meu mestre!

²³Polo que a ti toca, es unha preciosidade e moi discreta nas túas palabras. Se fas canto prometiches, o teu Deus será o meu Deus, e ti terás o teu asento no pazo de Nabucodonosor e serás famosa en toda a terra".