Read Biblia SEPT Xudit 12 Bible Online

Xudit 12 - Biblia SEPT bible

Xudit 12

¹Despois mandou que a conducisen ó lugar onde gardaba a súa vaixela de prata e dispuxo que a servisen na mesa dos seus propios manxares e que lle desen a beber do seu propio viño.

²Pero Xudit dixo: —"Non probarei nada diso, non me vaia servir de ocasión; senón que comerei do que trouxen comigo".

³Holofernes preguntoulle: —"E no caso de que se esgote o que trouxeches ti, de onde che traeremos outros alimentos coma eses? Pois entre nós non hai ninguén dos teus".

⁴Xudit respondeulle: —"Pola túa vida, meu señor, que non rematará a túa serva canto trouxo, antes de que o Señor leve a feliz termo pola miña man o seu designio".

⁵Entón os ministros de Holofernes acompañárona ata a súa tenda e durmiu ata a medianoite, e ergueuse á hora da vixilia matutina.

⁶Mandou este recado a Holofernes: —"Que o meu señor ordene que se lle permita á túa serva saír para orar".

⁷Holofernes mandou á súa escolta que de ningunha maneira llo impedisen. Ela permaneceu tres días no campamento. Todas as noites ía ó val de Betulia e lavábase, fóra do campamento, na fonte das augas.

⁸Só saír da auga, poñíase a rezar ó seu Señor, Deus de Israel, a fin de que dirixise o seu camiño para exaltación dos fillos do seu pobo.

⁹Despois, xa limpa, entraba na tenda e agardaba a comida que lle traían pola tarde.

¹⁰Entón chegou o cuarto día e Holofernes deu un banquete ós seus servidores sós, sen invitar a ningún dos seus ministros.

¹¹E díxolle ó eunuco Bágoas: —"Vai e persuade a esa muller hebrea, que está ó teu coidado, para que veña onda nós, e coma e beba connosco.

¹²Pois sería unha vergonza que unha tal muller fose despedida sen troulear con ela. Se non a conquistásemos, iríase rindo de nós".

¹³Bágoas, saíndo da presenza de Holofernes, entrou no departamento dela e díxolle: —"Non teñas medo, fermosa nena, de ires onda meu señor, para seres honrada na súa presenza, e connosco bebas viño e te enchas de ledicia, e sexas desde hoxe unha das doncelas dos asirios, presentes no pazo de Nabucodonosor".

¹⁴Xudit respondeu: —"Non contradicirei endexamais ó meu señor; antes farei gustosa canto lle praza, e gabareime de obrar así toda a miña vida".

¹⁵Entón ergueuse, puxo os vestidos e enfeites de muller e, adiantándose a súa serva, estendeu diante de Holofernes o tapiz que lle dera Bágoas para o seu uso cotián, para que se recostase nel ó tomar o seu alimento.

¹⁶Despois entrou Xudit e recostouse nel. O corazón de Holofernes quedou engaiolado ó contemplala, e a súa alma encheuse de emoción, e cobizaba vivamente xuntarse con ela; pois, desde o día que a viu, buscaba unha ocasión de seducila.

¹⁷Holofernes díxolle: —"Veña!, bebe ti tamén e alégrate connosco".

¹⁸Xudit respondeu: —"Si que beberei, Señor; pois, de todos os días da miña vida, este é o máis glorioso".

¹⁹E comeu e bebeu na presenza de Holofernes de todo canto lle preparara a súa serva.

²⁰Holofernes alegrouse moito véndoa, e bebeu moitísimo viño, máis do que endexamais bebera ningún outro día da súa vida, desde que nacera.