Read Biblia SEPT Xudit 14 Bible Online

Xudit 14 - Biblia SEPT bible

Xudit 14

¹Xudit díxolles: —"Escoitádeme, irmáns: tomade esta cabeza e colgádea nas ameas das vosas murallas;

²e cando a aurora empece a brillar e o sol teña saído sobre a terra, cada un collerá a súa arma, e sairedes todos os homes valentes, co xefe sinalado, coma se quixésedes baixar a campo aberto, do lado da avanzada dos fillos de Asur, mais non baixedes.

³Entón eles collerán as armas e irán ó seu campamento. Espertarán ós prefectos do exército asirio; correrán á tenda de Holofernes. O non atopalo, veranse presa do pavor e fuxirán diante de vós.

⁴Vós, entón, e cantos habitan nas montañas de Israel, seguirédelos ata exterminalos polos camiños.

⁵Mais, antes de facer todo isto, chamádeme ó amonita Ahicar, a fin de que vexa e recoñeza ó que desprezou a casa de Israel, que o mandou a nós como á morte".

⁶Fixeron, pois, vir a Ahicar da casa de Ozías. O chegar e ver a cabeza de Holofernes nas mans dun dos da asemblea do pobo, caeu a terra sen coñecemento.

⁷Reanimado de novo, axeonllouse ós pés de Xudit e así prostrado diante dela, dixo: —"Bendita ti en todas as tendas de Xudá e en todas as nacións; cantos oian o teu nome encheranse de estupor.

⁸Agora, pois, dime que foi o que fixeches neses días". Xudit contoulle, no medio do pobo, todo canto fixera desde o día en que saíra, ata ese mesmo momento en que lles falaba.

⁹E, rematado o relato, o pobo desatouse en gritos de ledicia.

¹⁰O ver Ahicar todo canto fixera o Deus de Israel, creu en Deus de todo corazón, e circuncidou a carne do seu prepucio, e uniuse á casa de Israel ata o día de hoxe.

¹¹O levantarse a aurora, colgaron a cabeza de Holofernes no muro, e todo varón de Israel botou man ás súas armas, e saíron en escuadróns, dirixíndose ós camiños que subían ó monte.

¹²Os asirios, ó velos, avisaron ós seus xefes, e estes ós xenerais, tribunos e a cantos tiñan mando.

¹³Correron á tenda de Holofernes para dárenlle a noticia ó procurador da súa casa: —"Esperta ó noso amo, pois eses escravos atrévense a baixar a nós para loitaren e atoparen a súa ruína, sen que fique un".

¹⁴Entón Bágoas entrou e moveu as cortinas da tenda, pois imaxinou que durmía con Xudit.

¹⁵Mais, como ninguén oía, separou as cortinas e entrou na tenda, e atopouno morto e tendido na entrada, coa cabeza cortada.

¹⁶Deu un gran berro, con xemidos e prantos, e rachou os seus vestidos.

¹⁷Despois entrou na tenda onde paraba Xudit e non a atopou, e correu cara ó pobo, bradando:

¹⁸—"Eses escravos saíron coa súa: unha muller dos hebreos encheu de vergonza a casa do rei Nabucodonosor; pois, velaquí a Holofernes xacente no chan, co seu corpo sen cabeza".

¹⁹O oíren isto os xefes do exército de Asur, racharon os seus vestidos, e apoderouse deles un gran terror, e levantouse no campamento un gran alarido e clamores.