Read Biblia SEPT Xudit 3 Bible Online

Xudit 3 - Biblia SEPT bible

Xudit 3

¹E enviáronlle mensaxeiros con proposicións de paz:

²—"Mira, nós somos servos do gran rei Nabucodonosor e prostrámonos diante de ti para que fagas de nós o que queiras.

³As nosas granxas e todo o noso territorio, os nosos campos de trigo, os nosos rabaños e vacadas e os fatos das ovellas, todo está á túa disposición; dispón de todo segundo te praza.

⁴Tamén as nosas cidades cos seus moradores están á túa disposición; fai con todo o que queiras".

⁵Os mensaxeiros chegaron ata Holofernes e comunicáronlle todo isto.

⁶Entón el descendeu á beiramar co seu exército, puxo guarnicións nas cidades fortes, e delas tomou os mellores homes e enrolounos nas súas tropas.

⁷Foi recibido por toda a rexión con coroas, danzas e pandeiros.

⁸El devastou o territorio e tallou os bosques sagrados, e mandou destruír todos os deuses daquela terra, co fin de que só Nabucodonosor fose adorado por todas as nacións e todas as linguas e tribos o invocasen coma deus.

⁹Unha vez na chaira de Esdrelón, onda Dotán, fronte á serra de Xudá,

¹⁰Acampou entre Gaba e Escitópolis, onde permaneceu un mes, en espera de provisións para o seu exército.