Read Biblia SEPT Éxodo 1 Bible Online

Éxodo 1 - Biblia SEPT bible

Éxodo 1

¹Estes son os nomes dos israelitas que foron a Exipto con Xacob, cada un coa súa familia:

²Rubén, Simeón, Leví, Xudá,

³Isacar, Zebulón, Benxamín,

⁴Dan, Naftalí, Gad e Axer.

⁵As persoas que descendían directamente do sangue de Xacob eran setenta. Xosé xa estaba en Exipto.

⁶Morto Xosé e seus irmáns e toda aquela xeración,

⁷os israelitas medraron, propagáronse, creceron, fixéronse moi fortes, enchían o país.

⁸Subiu ó trono de Exipto un rei novo, que non coñecera a Xosé,

⁹e díxolle ó seu pobo: —"Mirade que o pobo dos israelitas é máis forte ca nós.

¹⁰Imos tratalo con astucia, non sexa que, se se declara unha guerra, se axunte cos nosos inimigos, pelexe contra nós e logo saia do país".

¹¹Asignáronlles, pois, capataces, co fin de oprimilos con traballos, cando construían as cidades-graneiros de Pitom e de Ramsés.

¹²Pero, canto máis os oprimían, máis se multiplicaban eles e máis se propagaban.

¹³Os exipcios asoballáronos con fera opresión,

¹⁴Amarguexáronlles a vida co duro labor do barro, dos ladrillos, coa labranza da terra, e con toda sorte de traballos, impostos con brutalidade.

¹⁵Por parte, o rei de Exipto deu esta orde ás parteiras das hebreas, chamadas unha Xéfora e outra Púah:

¹⁶—"Cando asistades ós partos das hebreas, fixádevos no sexo: se nace varón, matádeo; se nace femia, que viva".

¹⁷Mais as parteiras mostráronse temerosas de Deus, e non fixeron caso do que lles mandara o rei de Exipto. Deixaban os nenos con vida.

¹⁸El fíxoas chamar, para dicirlles: —"Por que facedes iso de deixar nenos con vida?"

¹⁹Respondéronlle elas: —"As mulleres hebreas non son coma as exipcias. Son fortes e paren primeiro de que chegue onda elas a parteira".

²⁰Deus premiou ás parteiras. O pobo medraba e facíase moi forte.

²¹Por temeren a Deus, tamén as parteiras viron crecer a casa delas.

²²Entón ordenou o faraón ó seu pobo: "Todo neno que naza, botarédelo ó río; ás nenas deixádeas que vivan".