Read Biblia SEPT Éxodo 18 Bible Online

Éxodo 18 - Biblia SEPT bible

Éxodo 18

¹Ietró, sacerdote de Madián, sogro de Moisés, soubo o que Deus fixera con Moisés e co seu pobo Israel, ó sacalos de Exipto.

²Ietró recollera a Séfora, muller de Moisés, cando este se despedira,

³e tamén ós seus dous fillos, un chamado Guerxom, por aquilo de que "Forasteiro fun en terra allea",

⁴e outro de nome Eliézer, que quere dicir: "O Deus de meu pai é quen me axuda e quen me librou da espada do faraón".

⁵Ietró, sogro de Moisés, foi cos fillos e coa muller ó encontro do seu xenro, no deserto, onde acampaba Moisés na montaña de Deus.

⁶Mandoulle dicir a Moisés: —"Eu son o teu sogro Ietró, que te veño ver coa túa muller e cos teus fillos".

⁷Moisés saíu ó encontro do seu sogro; inclinouse e bicouno; saudáronse e entraron na tenda.

⁸Moisés contoulle ó seu sogro o que Deus fixera co faraón e cos exipcios por mor de Israel, e as coitas que tiveran na viaxe e como o Señor os librara delas.

⁹Ietró alegrouse de todo o ben que o Señor fixera a Israel, librándoo da man dos exipcios.

¹⁰E dixo: —"Bendito sexa o Señor que vos librou do poder dos exipcios e da man do faraón e que salvou o pobo do xugo de Exipto.

¹¹Agora sei que o Señor é máis ca todos os deuses, pois así o mostrou cando eles se erguían contra vós".

¹²Despois Ietró, sogro de Moisés, ofreceu a Deus sacrificios e holocaustos. Aharón e todos os anciáns de Israel viñeron e comeron con el na presenza de Deus.

¹³O día seguinte sentouse Moisés para xulgar as contendas do pobo. A xente acudía onda Moisés desde a mañá á noite.

¹⁴O ver Ietró o que o seu xenro facía polo pobo, preguntoulle: —"Por que fas así coa xente? Por que te sentas ti só a xulgar, coa xente toda ó redor, da mañá á noite?"

¹⁵Moisés respondeulle a seu sogro: —"A xente vén onda min para consultar a Deus.

¹⁶Cando teñen un preito, acoden onda min, para que eu decida e lles ensine os mandamentos e as leis de Deus".

¹⁷O sogro aconselloulle: —"Non está ben o que fas.

¹⁸Dese xeito esgotarédesvos, ti e mais o pobo que vai contigo. A tarefa reborda das túas forzas, e non poderás cumprila só.

¹⁹Agora faime caso. Eu dareiche un consello, e que Deus estea contigo. Ti representarás ó pobo diante Deus, levando á súa presenza os seus preitos.

²⁰E ó pobo recoméndalle os mandamentos e as leis, ensínalle o camiño que han seguir e as cousas que han facer.

²¹Procura no medio do pobo homes de valer e que teñan temor de Deus, homes firmes, inimigos da cobiza, e ponos á fronte do pobo, como xefes de mil, de cen, de cincuenta e de dez.

²²Eles xulgarán ó pobo a calquera hora. Que che leven a ti os preitos graves, e que resolvan eles os pequenos. A tarefa será máis livián para ti, se eles levan contigo o peso.

²³Se fas como che digo, poderás aturar ese traballo que Deus che ordenou, e todo este pobo chegará con ben ó seu destino".

²⁴Moisés escoitou as palabras do seu sogro, e fixo o que lle aconsellaba.

²⁵Elixiu de entre todo Israel homes de valer e púxoos á cabeza do pobo, coma xefes de mil, de cen, de cincuenta e de dez.

²⁶Administraban xustiza a calquera hora. Os preitos graves levábanllos a Moisés e os pequenos xulgábanos eles.

²⁷Moisés despediuse do seu sogro, e este volveu para a súa terra.