Read Biblia SEPT Éxodo 27 Bible Online

Éxodo 27 - Biblia SEPT bible

Éxodo 27

¹Farás o altar de madeira de acacia, cadrado, de cinco cóbados de longo, cinco de ancho e tres de alto.

²Nos catro ángulos faraslle saíntes coma cornos, que revestirás de bronce.

³Para o altar farás, sempre de bronce, caldeiros para a cinsa, paletas, aspersorios, tenaces e braseiros.

⁴Dotarás o altar dun enreixado, feito de bronce e en forma de rede. Nos catro cantos levará catro argolas de bronce.

⁵Porás o enreixado debaixo do reborde saínte do altar, desde a media altura ata o chan.

⁶Farás aínda para o altar varais de madeira de acacia, recubertos de bronce;

⁷meterasllos polas argolas dos costados, para podelo transportar.

⁸O altar faralo oco e de táboas, conforme o modelo que che mostrei na montaña.

⁹Co tabernáculo farás tamén o adro. Polo lado sur poraslle cortinas de liño fino torcido, cunha lonxitude de cen cóbados por lado.

¹⁰As súas vinte columnas estarán asentadas en vinte baseamentos de bronce. Os ganchos e as argolas das columnas serán feitos de prata.

¹¹Do mesmo xeito, polo norte, o adro levará unha cortina de cen cóbados de longa, vinte columnas asentadas en vinte baseamentos de bronce, con alcaiatas e argolas de prata.

¹²O ancho, polo ocaso, o adro levará unha cortina de cincuenta cóbados de longa, e dez columnas con outros tantos baseamentos.

¹³O ancho, polo nacente, a cortina terá tamén cincuenta cóbados.

¹⁴A un lado da porta irán quince cóbados de cortina, con tres columnas e os seus baseamentos.

¹⁵Do lado oposto, a mesma cousa.

¹⁶Para a porta do adro farás unha cortina de vinte cóbados, de púrpura violácea, escarlata e carmesí, de liño fino torcido e bordada; levará catro columnas cos seus baseamentos.

¹⁷Todas as columnas ó redor do adro levarán aneis de prata, con ganchos de prata e con baseamentos de bronce.

¹⁸O adro terá cen cóbados de longo, cincuenta de ancho e cinco de alto. Será de liño fino torcido, cos baseamentos de bronce.

¹⁹Todos os utensilios para calquera dos servizos do tabernáculo, as súas estacas e as do adro, serán todos de bronce.

²⁰Ordénalles ós israelitas que che traian aceite puro de oliva, para manter a lámpada acesa.

²¹Aharón e os seus fillos colocarana na Tenda do Encontro, por fóra do veo que tapa o testemuño, para que brille diante do Señor, desde a noite á mañá. Esta é lei perpetua para todas as xeracións de Israel.