Read Biblia SEPT Éxodo 28 Bible Online

Éxodo 28 - Biblia SEPT bible

Éxodo 28

¹Manda vir onda ti a teu irmán Aharón e a seus fillos Nadab, Abihú, Elazar e Itamar. De entre todos os israelitas serán eles os meus sacerdotes.

²A teu irmán Aharón faraslle vestimentas sacras, que lle dean honor e maxestade.

³Ordena a artesáns destros, dotados de espírito de sabedoría, que preparen as roupas coas que Aharón será consagrado sacerdote.

⁴Deberanlle facer estes ornamentos: o peitoral, o efod, o manto, a túnica bordada, a mitra e a faixa. Para faceren os vestidos sacros para o sacerdocio do teu irmán Aharón e dos seus fillos

⁵serviranse de ouro, de púrpura violácea, escarlata e carmesí, e de liño fino.

⁶O efod faralo de ouro, de púrpura violácea, escarlata e carmesí, e de liño fino torcido e bordado.

⁷Levará dúas ombreiras, unha por cada lado, que servirán para atalo.

⁸Terá para cinguilo un cíngulo, que será da súa mesma feitura: de ouro, de púrpura violácea, escarlata e carmesí, e de liño fino torcido.

⁹Collerás dúas pedras de ónix e gravarás nelas os nomes das tribos de Israel,

¹⁰seis nomes nunha pedra e seis na outra, por orde de nacemento.

¹¹Farás gravar os nomes das tribos de Israel nas dúas pedras, engastadas en ouro, como fan os ourives gravadores de selos.

¹²Despois porás as dúas pedras nas ombreiras do efod, para lembranza das tribos de Israel. Aharón levará sobre os ombreiros os nomes dos israelitas, para lembranza diante do Señor.

¹³Faraslles engastes de ouro

¹⁴e dúas cadeíñas de ouro puro, trenzadas coma un cordón, e poralas trenzadas nos engastes.

¹⁵Farás o peitoral das sortes, traballado con arte, da mesma feitura do efod, de ouro, de púrpura violácea, escarlata e carmesí, e de liño fino torcido.

¹⁶Será cadrado, dobre, un palmo de longo e un de ancho.

¹⁷Levará engastadas catro ringleiras de pedras. Na primeira unha sardónica, un topacio e unha esmeralda;

¹⁸na segunda un rubí, un zafiro e un xaspe;

¹⁹na terceira un ópalo, unha ágata e unha ametista;

²⁰e na cuarta un crisólito, un ónix e un berilo. Estarán todas nas súas ringleiras, engastadas en ouro.

²¹As pedras corresponden ós nomes das tribos de Israel, doce pedras por doce nomes. Cada unha levará gravado un nome, coma un selo; e así as doce tribos cos seus nomes.

²²Farás para o peitoral cadeíñas de ouro puro, trenzadas coma un cordón,

²³e dous aneis de ouro, que lle porás ó peitoral nos seus dous cabos.

²⁴Pasarás as dúas cadeíñas de ouro polos aneis dos dous cabos do peitoral,

²⁵e as puntas das cadeíñas fixaralas nos engastes, collidos no lado dianteiro das ombreiras do efod.

²⁶Farás outros dous aneis de ouro e poralos nos dous cabos da parte baixa do peitoral, polo lado de dentro, de cara ó efod.

²⁷E dous aneis máis que farás aínda, fixaralos nas dúas ombreiras do efod, na súa parte baixa dianteira, onda a xuntura, por enriba do cíngulo do efod.

²⁸Os aneis do peitoral ligaranse cos do efod cun cordón de púrpura violácea, de xeito que o peitoral quede por riba do cíngulo do efod e non se solte del.

²⁹Dese xeito Aharón levará os nomes das tribos de Israel no peitoral das sortes, sempre que entre no santuario, para lembranza perpetua diante do Señor.

³⁰No peitoral das sortes porás os urim e os tummim, e así irán sobre o corazón de Aharón, sempre que este entre onda o Señor, Aharón levará sempre sobre o corazón, na presenza do Señor, as sortes de Israel.

³¹Farás tamén tecer o manto do efod, todo de púrpura violácea.

³²No medio, por enriba, levará unha abertura, cunha orla de reforzo ó arredor, coma unha cota, para que non esgace.

³³No borde baixo, ó arredor, poraslle granadas de púrpura violácea, escarlata e carmesí, e, mesturadas con elas, campaíñas de ouro.

³⁴As granadas e as campaíñas alternaranse por todo o arredor.

³⁵Aharón vestirá este manto cando faga o servizo, de xeito que se sinta o tintín cando entre no santuario, na presenza de Deus, e tamén cando saia. Así non morrerá.

³⁶Farás unha flor de ouro puro e gravarás nela, como se grava un selo: Consagrado ó Señor.

³⁷Cun cordón de púrpura violácea suxeitarás a flor na cara dianteira da tiara.

³⁸Porala na testa de Aharón, que cargará coas culpas dos israelitas, cando estes ofrezan as súas ofrendas sacras. Aharón levará a flor sempre na fronte, para reconcilialos co Señor.

³⁹O manto do efod faralo de liño; e o mesmo a tiara e mais o cíngulo; será todo bordado.

⁴⁰Os fillos de Aharón faraslles tamén túnicas, cíngulos e tiaras, que lles dean honor e maxestade.

⁴¹Así é como vestirás a teu irmán Aharón e a seus fillos. Unxiralos e consagraralos, para que me sirvan como sacerdotes.

⁴²Faraslles calzóns de liño, que lles cubran cadrís e coxas, que lles tapen as partes.

⁴³Aharón e os seus fillos levaranos cando entren na Tenda do Encontro e cando se acerquen ó altar para o servizo do santuario, para que non cometan falta, e morran. Esta será lei perpetua para Aharón e para seus fillos.