Read Biblia SEPT Éxodo 30 Bible Online

Éxodo 30 - Biblia SEPT bible

Éxodo 30

¹Farás un altar de madeira de acacia, para queimar nel o incenso.

²Faralo cadrado, dun cóbado de longo, un de ancho e dous de alto, con cornos saíntes nos ángulos.

³Revestiralo de ouro puro, por enriba, polos lados e nos cornos; poraslle unha cinta de ouro ó redor.

⁴Debaixo da cinta, nos dous flancos, poraslle dúas argolas de ouro, para meter os dous varais con que podelo transportar.

⁵Os varais serán de madeira de acacia, revestidos de ouro.

⁶Colocarás o altar diante do veo que tapa a arca da alianza, diante do propiciatorio que cobre o testemuño, onde eu virei ó teu encontro.

⁷Aharón queimará nel incenso recendente, ó tempo de axeitar cada mañá as lámpadas,

⁸e cando as acenda pola tarde. Será incenso perpetuo diante do Señor, polas xeracións.

⁹Non ofreceredes nel incenso prohibido, nin holocaustos, nin ofrendas, nin verteredes libacións.

¹⁰Aharón fará por el a expiación, unxindo unha vez no ano os seus cornos co sangue do sacrificio polo pecado; así polas xeracións. O altar está consagrado ó Señor".

¹¹O Señor díxolle a Moisés:

¹²—"Cando contes os israelitas para facer o seu censo, cada persoa pagará ó Señor un rescate pola súa vida; así non sufrirán praga ningunha, ó seren rexistrados.

¹³Cada persoa rexistrada pagará medio siclo, segundo o peso do siclo do santuario que é de vinte óbolos; medio siclo será o voso tributo para o Señor.

¹⁴Cada persoa rexistrada, de vinte anos para arriba, pagará este tributo ó Señor.

¹⁵Nin o rico dará máis nin o pobre dará menos da metade dun siclo, como tributo ó Señor polo rescate das súas vidas.

¹⁶Recollerás o diñeiro do rescate dos israelitas e dedicaralo ó servizo da Tenda do Encontro. Servirá para memorial diante do Señor de que os israelitas rescataron as súas vidas".

¹⁷O Señor díxolle a Moisés:

¹⁸—"Farás unha pía de bronce, coa base tamén de bronce, para as ablucións. Porala entre a Tenda do Encontro e o altar e botarás auga nela.

¹⁹Aharón e seus fillos lavarán nela as mans e mais os pés.

²⁰Cando entren na Tenda do Encontro, lavaranse con auga, e así non morrerán. E o mesmo cando se acerquen ó altar para oficiar ou para queimar unha ofrenda ó Señor.

²¹Lavarán as mans e os pés, e así non morrerán. Esta é lei perpetua para eles e para os seus descendentes, polas xeracións".

²²O Señor díxolle a Moisés:

²³—"Procúrate aromas da mellor calidade: cincocentos siclos de mirra virxe, douscentos cincuenta de cinamomo recendente e douscentos cincuenta de canela,

²⁴cincocentos siclos de casia, en peso do santuario, e sete litros de aceite de oliveira.

²⁵Con todo iso farás o óleo da unción santa, un perfume recendente, coma o que fan os perfumistas. Será o óleo da unción santa.

²⁶Con el unxirás a Tenda do Encontro e a arca da alianza,

²⁷A mesa cos seus recipientes, o candelabro cos seus trebellos, o altar do incenso,

²⁸o altar dos holocaustos con todos os seus utensilios, e a pía coa súa base.

²⁹Consagrarás estas cousas todas, para que sexan santísimas: calquera que as toque quedará tamén santificado.

³⁰Unxirás a Aharón e a seus fillos, para que me queden consagrados na función de sacerdotes.

³¹Diraslles ós israelitas: Este será o meu óleo santo da unción polas xeracións.

³²Non poderedes unxir con el ningunha outra persoa. Nin faredes un preparado coma este. Foi consagrado, e será santo para vós.

³³Calquera que prepare outro óleo coma este e unxa con el un profano, será excluído do pobo".

³⁴O Señor díxolle a Moisés: —"Procúrate estes aromas: ámbar, uña recendente, gálbano e incenso puro, todo nas mesmas cantidades.

³⁵Con todo iso prepara o incenso, conforme á arte dos perfumistas, mesturado con sal, puro e santo.

³⁶Despois moerás un pouco, ata convertelo en po, e porás unha parte del diante da arca, na Tenda do Encontro, na que eu virei onda ti. Terédelo por cousa santa.

³⁷Para os vosos usos non faredes incenso composto conforme a esa receita. Ese terédelo por cousa consagrada ó Señor.

³⁸O que faga para o seu uso un aroma coma ese, será excluído do pobo".