Read Biblia SEPT Éxodo 34 Bible Online

Éxodo 34 - Biblia SEPT bible

Éxodo 34

¹O Señor díxolle a Moisés: —"Labra dúas táboas de pedra, o mesmo cás primeiras. Eu escribirei nelas as palabras que había nas que rompiches.

²Disponte para mañá. Sube cedo ó monte Sinaí e agárdame alí, no cume da montaña.

³Que ninguén suba contigo; que non se vexa unha persoa en todo o monte; que non pazan preto del nin ovellas nin vacas".

⁴Moisés labrou dúas táboas de pedra, o mesmo cás primeiras. Ergueuse cedo e rubiu ó monte Sinaí, conforme lle mandara o Señor, levando consigo as dúas táboas de pedra.

⁵O Señor baixou na nube e parou alí con el. Moisés pronunciou o nome do Señor.

⁶O Señor pasou diante del proclamando: —"O Señor, o Señor, Deus compasivo e benfeitor, tardo á ira, rico en amor e lealdade,

⁷que garda o seu amor ata a milésima xeración, que perdoa as culpas, os pecados e os erros, pero non declara inocente ó culpado, e castiga as culpas dos pais ata a terceira e a cuarta xeración".

⁸Moisés, ó tempo que se prostraba polo chan e adoraba,

⁹dixo: —"Se merezo, Señor, o teu favor, pídoche que veñas ti connosco. Este pobo ten cerviz dura, pero ti perdoarás as nosas culpas e pecados e farás de nós a túa herdade".

¹⁰O Señor respondeulle: —"Eu vou facer convosco unha alianza. A vista de todo o teu pobo farei marabillas que nunca se fixeron en ningún país nin nación. Todo o pobo que te rodea poderá ver os feitos do Señor, pois farei por medio de ti cousas marabillosas.

¹¹Observa o que hoxe che mando. Eu botarei de diante de ti ós amorreos, ós cananeos, ós hititas, ós perizitas, ós hivitas e ós iebuseos.

¹²Gárdate de facer pactos cos moradores da terra na que entras, para que logo non teñas contigo unha trapela.

¹³Polo contrario, derrubarás os seus altares, crebarás as súas estelas, tronzarás as súas árbores sagradas.

¹⁴Non adorarás deuses alleos, porque o Señor, que leva nome de celoso, éo de verdade.

¹⁵Non concluirás pactos cos moradores do país, non sexa que, despois de se prostituíren cos seus deuses e de lles ofreceren culto, te conviden a comer dos seus sacrificios e ti aceptes.

¹⁶Non tomes de entre as súas fillas mulleres para os teus fillos, non sexa que ó prostituírense elas cos seus deuses, leven á prostitución tamén ós teus fillos.

¹⁷Non te fagas imaxes de deuses.

¹⁸Garda a festa dos Ácimos. Sete días comerás pan sen levedar, como che mandei, pola festa do mes de abib, pois no mes de abib saíches de Exipto.

¹⁹Todos os primoxénitos son meus; e meus son tamén os primoxénitos machos do teu gando, das ovellas e das vacas.

²⁰As primeiras crías da asna poderalas rescatar por unha ovella; pero, se non as rescatas, deberalas esnocar. Rescatarás os teus fillos primoxénitos. E non viredes onda min coas mans baldeiras.

²¹Seis días traballarás e o sétimo descansarás. Descansarás o mesmo na sementeira coma na recolleita.

²²Celebrarás a festa das Semanas, ó comezo da sega do trigo, e a festa da Colleita, á fin do ano.

²³Tres veces no ano presentaranse todos os varóns diante do Señor, Deus de Israel.

²⁴Cando eu bote as nacións de diante ti e anchee as túas fronteiras, ninguén cobizará a túa terra, namentres sobes visitar o Señor o teu Deus, as tres veces no ano.

²⁵Non ofrecerás pan lévedo co sangue do sacrificio. Do sacrificio da festa da Pascua non deixarás quedar nada para o día seguinte.

²⁶Levarás á casa do Señor o teu Deus os primeiros froitos da túa terra. Non cocerás o cabrito no leite de súa nai".

²⁷O Señor díxolle a Moisés: —"Pon por escrito estas palabras, pois conforme a elas fago contigo e con Israel esta alianza".

²⁸Moisés estivo alí co Señor corenta días e corenta noites. Nelas non comeu pan nin bebeu auga. E escribiu nas táboas as palabras da alianza, os dez mandamentos.

²⁹Cando Moisés baixou do monte Sinaí, traendo consigo as dúas táboas da alianza, non sabía que lle brillaba a pel da cara, por conversar co Señor.

³⁰O veren que a pel da cara lle brillaba, Aharón e os israelitas tiñan medo de aproximarse a Moisés.

³¹Moisés chamou por eles e entón viñeron onda el Aharón e os xefes da comunidade. E Moisés conversou con eles.

³²Despois acercáronse a el todos os israelitas, e Moisés deulles as ordes que recibira do Señor no monte Sinaí.

³³Cando acabou de falarlles, tapou a cara cun veo.

³⁴Sempre que Moisés entraba onda o Señor para falar con El, quitaba o veo, ata que volvía a saír. Cando saía, dáballes ós israelitas as ordes do Señor.

³⁵Os israelitas podían ver como lle brillaba a pel da cara. Pero Moisés tapábaa co veo, ata que volvía outra vez a falar con Deus.