Read Biblia SEPT Éxodo 35 Bible Online

Éxodo 35 - Biblia SEPT bible

Éxodo 35

¹Moisés reuniu a asemblea, para dicir ós israelitas: —"Estas son as ordes do Señor:

²Seis días traballaredes, pero o sétimo será día santo, sábado de repouso, dedicado ó Señor. O que traballe nese día será reo de morte.

³No sábado non acenderedes lume en ningunha das vosas casas".

⁴Moisés comunicoulle á asemblea dos israelitas: —"Estas son as ordes do Señor:

⁵Separade dos vosos bens unha ofrenda para o Señor. Cada un traerá xenerosamente en ofrenda para o Señor ouro, prata ou bronce;

⁶púrpura violácea, escarlata e carmesí, liño ou pelo de cabra;

⁷peles de carneiro curtidas, peles de teixugo ou madeira de acacia;

⁸Aceite para o candelabro, aromas para o óleo de unción e para o incenso;

⁹pedras de ónix ou pedras de engaste para o efod e para o peitoral.

¹⁰Cantos de entre vós teñan habilidade, que veñan para facer o que ordenou o Señor:

¹¹o tabernáculo coa súa Tenda, e coa súa cuberta, os broches, as táboas, os varais,

¹²as columnas e os baseamentos; A arca cos seus varais, o propiciatorio e o veo que o tapa;

¹³A mesa cos seus varais e cos seus accesorios, e os pans presentados;

¹⁴o candelabro para alumar, cos seus trebellos, coas lámpadas e co aceite do alumado;

¹⁵o altar do incenso cos seus traveseiros, o óleo de unción, o incenso recendente, o veo da entrada do tabernáculo;

¹⁶o altar dos holocaustos, coa súa reixa de bronce, cos seus varais e con todos os seus trebellos, e a pía coa súa base;

¹⁷As cortinas do adro, coas súas columnas e os seus baseamentos, e o veo da entrada do adro;

¹⁸As estacas do tabernáculo e do adro, coas súas cordas;

¹⁹As vestiduras tecidas para o servizo do santuario e as vestiduras sacras de oficiar do sacerdote Aharón e as dos seus fillos".

²⁰A comunidade dos israelitas retirouse de onda Moisés,

²¹e todos os que con espírito xeneroso así o decidiron trouxéronlle ó Señor a súa ofrenda para as obras da Tenda do Encontro, para o culto e para as súas sagradas vestiduras.

²²Chegaban homes e mulleres, todos os que eran xenerosos, e traían broches, colares, aneis, torques e outros moitos obxectos de ouro; cada un facía a súa ofrenda de ouro ó Señor.

²³Os que tiñan púrpura violácea, escarlata e carmesí, liño, pelo de cabra, peles curtidas de carneiro ou peles de teixugo, traían diso que tiñan.

²⁴Os que preferían ofrecer prata ou bronce, facían diso a súa ofrenda ó Señor. Os que tiñan madeira de acacia, traían a madeira para as variadas obras do culto.

²⁵As mulleres expertas na arte de fiar, viñan cos seus fiados de púrpura violácea, escarlata e carmesí, ou de liño fino.

²⁶As que tiñan habilidade para isto e a vontade de facelo, traían pelos de cabra.

²⁷Os xefes ofrecían pedras de ónix e pedras de engaste, para o efod e para o peitoral;

²⁸e, por parte, os aromas, o aceite para alumar, o óleo da unción, o incenso recendente.

²⁹Todo home e muller de espírito xeneroso para poñer a súa parte na obra que o Señor ordenara facer por medio de Moisés, traía a súa ofrenda ó Señor.

³⁰Moisés díxolles ós israelitas: —"Vedes que o Señor escolleu a Besalel, fillo de Urí, fillo de Hur, da tribo de Xudá,

³¹e que o encheu do espírito de Deus, de sabedoría, de intelixencia e de habilidade para toda sorte de labores:

³²para concibir proxectos, para labrar o ouro, a prata e o bronce,

³³para tallar pedras e engastalas, para tallar madeira e acabar calquera obra de arte.

³⁴Deulle tamén capacidade para dirixir, a el e a Oholiab, fillo de Ahisamac, da tribo de Dan.

³⁵Deus deulles moita habilidade para levaren a termo calquera sorte de traballo de arte, recamado de púrpura violácea, escarlata e carmesí, para proxectar e para realizar calquera obra".