Read Biblia SEPT Éxodo 36 Bible Online

Éxodo 36 - Biblia SEPT bible

Éxodo 36

¹Besalel, Oholiab e todos os homes destros, ós que o Señor dera sabedoría e intelixencia para saberen facer a obras destinadas ó culto sagrado, puxéronse ó traballo conforme o mandara o Señor.

²Moisés chamou a Besalel, a Oholiab e a todos os homes destros, ós que o Señor dera habilidade e a cantos estaban dispostos a pó-la súa parte na realización das obras,

³e entregoulles os materiais que os israelitas lle trouxeran coma ofrenda para a obra do santuario que se había facer. Os israelitas seguían traendo máis ofrendas, unha mañá tras doutra.

⁴Deixando o seu traballo respectivo na construción do santuario, viñeron os sabios artesáns

⁵e dixéronlle a Moisés: —"O pobo está traendo xa máis do que cómpre para facer as obras que mandou o Señor".

⁶Entón deu Moisés a orde de pregoar no campamento: —"Que ningún home nin muller se esforce en traer máis ofrendas para as obras do santuario". E o pobo deixou de traer.

⁷O que trouxeran xa chegaba e sobraba para facer todas as obras.

⁸Os máis destros dos artífices puxéronse a facer o tabernáculo, de dez lenzos de liño fino torcido, de púrpura violácea, escarlata e carmesí, con querubíns bordados.

⁹Cada lenzo medía vinte e oito cóbados de longo por catro de ancho; eran todos da mesma medida.

¹⁰Os lenzos empalmaban uns cos outros, en dúas series de cinco.

¹¹Fixeron logo presillas de púrpura violácea e puxéronos na orla do lenzo extremo dunha serie, e despois no da outra.

¹²Cincuenta presillas ían na orla dun lenzo e cincuenta na do outro, de xeito que se correspondían entre elas.

¹³Fixeron tamén cincuenta broches de ouro e uniron con eles os lenzos entre si. Dese xeito o santuario formaba un conxunto.

¹⁴Teceron despois once lenzos de pelo de cabra, que servían de Tenda ó tabernáculo.

¹⁵Cada lenzo medía trinta cóbados de longo e catro de ancho, todos da mesma medida.

¹⁶Empalmaron nunha serie cinco lenzos e seis noutra,

¹⁷e puxeron cincuenta presillas na orla de cada unha das dúas series de lenzos empalmados.

¹⁸Fundiron cincuenta broches de bronce para xuntar os lenzos da Tenda e que constituísen unha unidade.

¹⁹Fixeron para o tabernáculo unha cuberta de peles curtidas de carneiro, con outra cuberta por enriba de peles de teixugo.

²⁰Despois fixeron as táboas do tabernáculo de madeira de acacia, e puxéronas en pé.

²¹Cada unha medía dez cóbados de longo e un e medio de ancho.

²²Cada táboa remataba en dous cantís, para ensamblar unhas nas outras; as táboas eran iguais.

²³Logo distribuíron deste xeito as táboas do tabernáculo: vinte táboas polo lado sur, ó mediodía,

²⁴ás que puxeron debaixo corenta baseamentos de prata, dúas por cada táboa ou unha por cada cantil.

²⁵No outro lado do tabernáculo, o que mira cara ó norte, puxeron outras vinte táboas,

²⁶cos seus corenta baseamentos de prata, dúas debaixo de cada táboa.

²⁷Polo flanco do tabernáculo que mira cara ó mar puxeron seis táboas,

²⁸con dúas máis para que formasen os dous cantos.

²⁹Estas eran parellas por abaixo e encaixaban para arriba, ata a primeira argola. Dese xeito fixeron os dous cantos.

³⁰Eran, por xunto, oito táboas, con dezaseis baseamentos de prata, dúas para cada táboa.

³¹Fixeron tamén os traveseiros, de madeira de acacia, cinco para as táboas dun flanco do tabernáculo,

³²cinco para as do outro e cinco para as do ocaso.

³³Fixeron tamén o traveseiro que pasa polo medio das táboas, desde unha punta á outra.

³⁴As táboas revestíronas de ouro, e o mesmo os traveseiros. Tamén eran de ouro as argolas polas que pasaban os traveseiros.

³⁵Fixeron despois o veo, de púrpura violácea, escarlata e carmesí e de liño fino torcido, con querubíns bordados.

³⁶Para penduralo fixeron catro columnas de madeira de acacia, revestidas de ouro, con ganchos tamén de ouro; para as columnas fundiron catro baseamentos de prata.

³⁷Para a entrada da Tenda fixeron unha cortina, de púrpura violácea, escarlata e carmesí, de liño fino torcido, e bordada.

³⁸Levaba cinco columnas que a sostiñan, provistas de ganchos. Os seus capiteis e as súas molduras revestíronos de ouro e os seus baseamentos de bronce.