Read Biblia SEPT Éxodo 40 Bible Online

Éxodo 40 - Biblia SEPT bible

Éxodo 40

¹O Señor díxolle a Moisés:

²—"O día un do mes primeiro montarás o tabernáculo da Tenda do Encontro.

³Dentro del porás a arca da alianza, que taparás co veo.

⁴Meterás tamén a mesa e disporás o que hai que pór enriba dela. Colocarás o candelabro e acenderás as súas lámpadas.

⁵Porás o altar de ouro do incenso diante da arca da alianza e colgarás a cortina da entrada do tabernáculo.

⁶Na entrada do tabernáculo da Tenda do Encontro porás o altar dos holocaustos.

⁷Entre a Tenda do Encontro e o altar colocarás a pía e botarás a auga nela.

⁸Porás ó redor do adro as cortinas e a cortina da entrada do adro.

⁹Collerás logo o óleo da unción e unxirás o tabernáculo con todo o que hai nel; consagraralo cos seus accesorios, e quedará consagrado.

¹⁰Unxirás tamén o altar dos holocaustos con todos os seus utensilios; consagraralo e será sacrosanto.

¹¹Unxirás e consagrarás tamén a pía coa súa base.

¹²Despois farás que se aproximen Aharón e seus fillos á entrada da Tenda do Encontro e que alí se laven.

¹³Vestiraslle as vestiduras sacras a Aharón, unxiralo e consagraralo para o meu servizo.

¹⁴Logo mandarás que veñan seus fillos e vestiraslles as súas túnicas.

¹⁵Unxiralos, como fixeras con seu pai, para o meu sacerdocio, e a unción conferiralles un sacerdocio perpetuo polas xeracións".

¹⁶Moisés fixo todo como lle mandara o Señor.

¹⁷O día un do mes primeiro do ano segundo levantouse o santuario.

¹⁸Moisés fíxoo montar desta maneira: puxo as bases, colocou as táboas, meteu os traveseiros, levantou as columnas,

¹⁹despregou a Tenda encol do tabernáculo, púxolle por riba a cuberta, como o Señor mandara a Moisés.

²⁰Despois colleu Moisés as táboas da alianza e meteunas na arca. Púxolle á arca os varais e colocou o propiciatorio encol dela.

²¹Meteu a arca no tabernáculo e puxo o veo que tapaba a arca da alianza, conforme o Señor ordenara a Moisés.

²²Logo meteu a mesa na Tenda do Encontro, ó norte do tabernáculo e por fóra do veo.

²³Dispuxo enriba dela os pans presentados ó Señor, como o Señor lle mandara a Moisés.

²⁴Colocou o candelabro na Tenda do Encontro, polo lado sur, enfronte da mesa.

²⁵Acendeu as lámpadas diante do Señor, como o Señor lle mandara a Moisés.

²⁶Puxo tamén na Tenda do Encontro, por diante do veo, o altar de ouro

²⁷e queimou nel incenso recendente, como o Señor mandara a Moisés.

²⁸A entrada do tabernáculo colocou a cortina.

²⁹A entrada da Tenda do Encontro puxo o altar dos holocaustos e enriba del ofreceu holocaustos e ofrendas, como o Señor lle mandara a Moisés.

³⁰Entre a Tenda do Encontro e o altar puxo a pía e botou nela auga para as ablucións.

³¹Alí lavaban as mans e os pés Moisés, Aharón e seus fillos,

³²cando entraban na Tenda do Encontro e cando se aproximaban ó altar, como o Señor mandara a Moisés.

³³Montou tamén o adro ó redor do tabernáculo e do altar e pendurou a cortina da entrada do adro. E así rematou Moisés a obra toda.

³⁴Entón a nube cubriu a Tenda do Encontro e a gloria do Señor encheu o tabernáculo.

³⁵Moisés non podía entrar na Tenda, por pousarse a nube enriba dela e porque a gloria do Señor enchía o tabernáculo.

³⁶Nas xeiras do camiño que deberon facer os israelitas, cando a nube se erguía de enriba do tabernáculo, eles púñanse en marcha.

³⁷Pero se a nube non se erguía, eles non se movían ata vela moverse.

³⁸En todas as súas xeiras os israelitas puideron observar como a nube do Señor pousaba polo día encol do tabernáculo e como pola noite se convertía en lume.