Read Biblia SEPT Xob 1 Bible Online

Xob 1 - Biblia SEPT bible

Xob 1

¹Houbo unha vez un home na terra de Us, que se chamaba Xob. Era o tal un home íntegro e xusto, que temía a Deus e se arredaba do mal.

²Nacéranlle sete fillos e tres fillas.

³Compúñase a súa habenza de sete mil ovellas, tres mil camelos, cincocentas xugadas de bois, cincocentas burras, e servos numerosos. Aquel home era o máis rico dos orientais.

⁴Tiñan os fillos costume de facer cadanseu banquete nas súas casas, en cadanseu día; e mandaban convite ás tres irmás para comeren e beberen xuntos.

⁵O remate deses días de festa facíaos vir Xob para purificalos; erguíase de mañá e ofrendaba holocaustos por todos eles, pois dicía para si: —"E quen sabe se non terán pecado estes meus fillos, renegando de Deus nas súas conciencias?" E deste xeito obraba sempre.

⁶Aconteceu, pois, un día que, ó viren os anxos render acatamento diante de Iavé, achegouse tamén con eles Satán.

⁷E preguntoulle Iavé a Satán: —"De onde chegas?" Respondeulle Satán a Iavé: —"De dar unha volta pola terra".

⁸Díxolle Iavé a Satán: —"Xa reparaches no meu servo Xob? Home coma el non o hai no mundo, íntegro e xusto, temeroso de Deus e arredado do mal".

⁹Respondeu Satán a Iavé: —"Seica Xob teme a Deus de balde!

¹⁰Non será que o tes ti ben cinguido cun valado, el, o seu lar, e canto posúe, e que bendiciches canto fai, e que o seu gando se espalla por toda a campía?

¹¹Pero ponlle a man enriba e tócalle no que posúe, e has ver se non te maldí na cara!"

¹²Díxolle Iavé a Satán: —"Ben: fai o que queiras coas súas cousas; soamente non poñas a man nel". Entón saíu Satán de diante de Iavé.

¹³E aconteceu no día en que estaban a xantar e beber viño os seus fillos e fillas no pazo de seu irmán o vinculeiro,

¹⁴cando chegou a Xob un criado dicindo: —"Estaban os bois arando e as burras a carón pacendo

¹⁵e caeu sobre eles unha banda de xabeos que roubaron, despois de pasaren polo ferro ós mozos. Salveime só eu para cho contar".

¹⁶Aínda non rematara este de falar cando chegou outro a dicir: —"Caeu un lóstrego do ceo, e consumiu ovellas e pastores. Salveime só eu para cho contar".

¹⁷Aínda non rematara este de falar cando chegou outro a dicir: —"Os caldeos, formados en tres bandas, botáronse contra os camelos e leváronos, despois de pasaren polo ferro ós mozos. Salveime só eu para cho contar".

¹⁸Aínda non rematara este de falar cando chegou outro a dicir: —"Estaban os teus fillos e fillas a xantar e beber viño no pazo de seu irmán o vinculeiro,

¹⁹cando velaquí que xurdiu un furacán de máis alá da estepa, e deu polos catro cantos na casa, que caeu sobre os rapaces, e matounos. Salveime só eu para cho contar".

²⁰Daquela ergueuse Xob, rachou o manto, rapou a cabeza, e botándose por terra, prosternouse dicindo:

²¹—"Espido saín do seo da miña nai e espido a el hei de tornar. Iavé deu, Iavé quitou: bendito sexa o nome de Iavé!"

²²Con todo, non pecou Xob botando protestas contra Deus.