Read Biblia SEPT Xob 10 Bible Online

Xob 10 - Biblia SEPT bible

Xob 10

¹Dáme noxo a vida, vou dar ó vento o meu laio, hei falar con corazón amargo.

²Heille rogar a Deus: Non me condenes! Faime saber cal é a túa causa contra min!

³Coidas ti que está ben oprimíresme, e rexeitar a obra das túas mans, mentres favoreces as matinacións dos impíos?

⁴Tes ti ollos de carne? Ves ti as cousas como as ven os homes?

⁵Son os teus días coma os dos humanos? Son os teus anos coma os do home?

⁶Ti, que estás a pescudar na miña chata, que esculcas o meu pecado,

⁷por máis que me sabes non culpable e que ninguén se ceiba das túas mans!

⁸Esas túas mans fixéronme na olería, todo me moldearon, e vasme agora aniquilar?

⁹Lémbrate que me moldeaches de arxila e que me has tornar ó po!

¹⁰Non me vertiches ti coma o leite e coma o queixo me callaches?

¹¹Vestíchesme de pel e carne tecíchesme con ósos e tendóns;

¹²déchesme a vida, tivéchesme boa lei; o teu coidado gardaba o meu espírito.

¹³E con todo, acochabas isto na túa mente! Agora sei cal era a túa teima!

¹⁴Estabas a axexar por se eu pecaba para non me deixar ir absolto.

¹⁵Se teño culpa, pobre de min!, e aínda inocente, non erguerei a testa, farto de aldraxes e bébedo de coitas.

¹⁶E se a erguese, cazarasme coma león, renovando fazañas contra min.

¹⁷Repós contra min as túas testemuñas, multiplicas cara a min a túa carraxe, a cotío renovas as tropas que me atacan.

¹⁸E logo, por que me tiraches do ventre? Mellor que morrese e que ninguén me ollase!

¹⁹Sería igual que se nunca existise: conducido desde o ventre para a cova.

²⁰Non son xa poucos os meus días de vida? Déixeme El en paz para que relouque un intre

²¹Antes de que parta sen retorno para o país das tebras e a negrume mortal

²²para a terra da escuridade máis noitébrega, sombra da morte, arredada da orde, onde o mesmo alumar é tebra!"