Read Biblia SEPT Xob 11 Bible Online

Xob 11 - Biblia SEPT bible

Xob 11

¹E Sofar o namateo empezou a dicir:

²—"Vai ficar sen resposta tal falabarato? Vai levar a razón o leriante?

³Vai silenciar ós demais o teu latricar? Habíaste de mofar sen que ninguén se opoña?

⁴Ti ben que dixeches: A miña doutrina é limpa, estou diante de ti coma home puro.

⁵Mais oxalá Deus falase e abrise os seus labios contra ti!

⁶Mostraríache os misterios da Sabedoría, pois ten moitos aspectos o saber; decataríaste entón de que xa tolleu parte da túa culpa.

⁷Podes ti, por caso, dexergar o profundo de Deus? Poderaste achegar ata os confíns do Omnipotente?

⁸É máis alto có ceo: que lle vas facer ti? Máis fondo có Xeol: que podes ti saber?

⁹É máis longo cá terra; é máis ancho có mar.

¹⁰Cando El pasa a conta, encadea e chama a xuízo, quen o disuadirá?

¹¹Coñece ben á xente falsa; olla a iniquidade sen que ninguén o albisque.

¹²Pero o home tolo recobrará o seu siso cando o onagro montés naza desbravado!

¹³Mais se ti entras en razón e estendes cara a El as túas mans,

¹⁴se arredas o mal das túas palmas e non cobizas na túa tenda a ruindade,

¹⁵poderás erguer a fronte sen chata, afincarte no chan sen ter medo.

¹⁶Daquela esquecerías as túas mágoas; recordaríaste delas coma de auga pasada.

¹⁷Coma o mediodía xurdiríache a vida e mesmo a tebra trocaríase en abrente.

¹⁸Poderás entón afiuzar, porque existe esperanza, ollar ó teu arredor, e adormecer acougado,

¹⁹pousarte sen que ninguén te espante; e haberá moitos que veñan gañar o teu favor.

²⁰Mais os ollos dos impíos devecen: perdéuselles o refuxio, quédalles coma esperanza soamente o expirar".