Read Biblia SEPT Xob 13 Bible Online

Xob 13 - Biblia SEPT bible

Xob 13

¹Todo iso xa o viron os meus ollos, escoitárono os meus oídos, e caín ben na conta.

²O que saibades vós, tamén o sei eu, que en nada vos son menos.

³Pero quen me dese falarlle ó Omnipotente! O que eu arelo é discutir con El.

⁴Vós sodes, abofé, uns cuspe—trolas falaces menciñeiros todos vós.

⁵Quen me dese que caledes dunha vez: vindo de vós, sería gran sabedoría!

⁶Oíde, por favor, o meu agravio! Entendede a disputa dos meus labios!

⁷Ides defender a Deus con falsidades, pronunciándovos no seu favor con engano?

⁸Ides darlle vantaxe ou tomar partido ó seu favor?

⁹Sentaríavos ben que El vos sondase? Coidades de entrampalo, como se fai cos homes?

¹⁰Por certo que vos había zorregar, se o queredes favorecer ás agachadas!

¹¹Non vos arrepía a súa maxestade? Non cae o seu medo sobre vós?

¹²Os vosos ditos son refráns borrallentos, e as vosas defensas, escudos de arxila.

¹³Estádeme calados! Vou falar eu, e que sexa o que queira!

¹⁴Collerei cos meus dentes a miña carne e levarei nas mans a miña vida.

¹⁵Aínda que me dese a morte, xa tería esperanza con tal de defender na súa cara o meu obrar.

¹⁶Iso xa sería para min unha vitoria, pois El non deixa ó impío comparecerlle diante.

¹⁷Escoitádeme atentos esta razón, que a miña declaración chegue ós vosos oídos!

¹⁸Teño ben preparada a miña defensa, pois estou certo de ser o inocente.

¹⁹Quen é o que quere preitear comigo? Pois calar agora sería morrer.

²⁰Soamente non me fagas dúas cousas, e entón xa non me esconderei de ti.

²¹Aparta de min a túa opresión, e que tampouco o teu terror non me espante!

²²Inquíreme despois, e responderei! E, se non, podo eu expoñer, e ti replicas.

²³Cantas son as miñas culpas e pecados? Móstrame ti as miñas faltas e os meus erros!

²⁴Por que ocultas o rostro e me tes por inimigo?

²⁵Teimas en amedrentar unha folla que foxe? Vaste pór a perseguir unha palla seca?

²⁶Pois anotas na miña conta rebelións, fasme levar as chatas da miña mocidade,

²⁷átasme os pés no cepo e estasme a vixiar cada vieiro, debuxando as marcas dos meus pasos.

²⁸Bótase a perder coma cousa podre, coma a roupa comesta pola traza.