Read Biblia SEPT Xob 18 Bible Online

Xob 18 - Biblia SEPT bible

Xob 18

¹Falou de novo Bildad o xuhita e dixo:

²—"Ata cando vas armar trampas coas verbas? Repénsao, e despois falaremos!

³Por que nos tes por bestas? Coidas que somos badocos?

⁴Ti estrágaste na túa xenreira, e pola túa causa haberá que deixar deserta a terra ou remover as rochas?

⁵Tamén se extingue a luz dos impíos e non brillan faíscas no seu lume;

⁶escurécese a luz da súa tenda e sobre el apágase a candea.

⁷Fanse máis breves os seus pasos firmes e derrúbao a súa propia matinación;

⁸vai dar na rede polos seus pés, reméxese entre as mallas;

⁹Atrapállao o lazo polos nocellos e aferra nel o cepo.

¹⁰Para el está escondida a corda no chan e o cepo de caza na súa corredoira

¹¹O seu arredor espántano os terrores, escorréntano a cada paso.

¹²Está famenta del a desgraza e a calamidade prepáralle a caída.

¹³A doenza róelle na pel, morde nos seus membros o vinculeiro da morte.

¹⁴Arríncano da súa cómoda tenda, lévano diante do rei dos terrores;

¹⁵mora na súa tenda a pantasma; espallan xofre polos seus eidos.

¹⁶Sécanlle por debaixo as raíces, múrchanlle por riba as pólas.

¹⁷Desaparece a súa fama do país, non ten sona na rexión.

¹⁸Empúxano da luz para a escuridade, refúgano do mundo.

¹⁹Sen prole nin descendencia no seu pobo, sen quen lle sobreviva nos seus eidos.

²⁰Tremerán co seu fado os occidentais, encheranse de arrepío os orientais:

²¹Velaquí as moradas do inicuo; este é o posto de quen rexeita a Deus".