Read Biblia SEPT Xob 20 Bible Online

Xob 20 - Biblia SEPT bible

Xob 20

¹Sofar o namateo respondeulle:

²—"A este propósito rebole en min un matinar, por isto desacóugase a miña mente.

³Tiven que oír a burla do teu aviso e, con todo, responde en min un espírito asisado:

⁴Non sabes ti de sempre, desde que foi posto o home sobre a terra,

⁵que o reloucar dos malvados é para pouco e que a ledicia dos impíos dura un intre?

⁶Aínda que chegue ata o ceo a súa soberbia, e aínda que toque ata as nubes coa cabeza,

⁷coma o esterco perderase para sempre e han preguntar os que o ollaron: Ulo?

⁸Voará coma un soño sen que o atopen e pasará coma visión noitébrega.

⁹Xa non o albiscarán os que o miraron, non o verá máis o lugar onde moraba.

¹⁰Os seus fillos indemnizarán ós pobres, pois coas mans terán que repoñer a súa fortuna.

¹¹A súa osamenta chea de xuventude con el ten que se deitar no po.

¹²Se era tan doce para a súa boca o mal que o deixaba esluír baixo a lingua,

¹³que o mantiña sen o deixar pasar, reténdoo no padal,

¹⁴podrece agora o seu xantar no ventre e fáiselle alí dentro fel de cóbregas.

¹⁵Riquezas que enguliu, tenas que vomitar; é Deus mesmo quen llas saca do ventre.

¹⁶Zugará a pezoña das cóbregas; hao rematar a lingua das serpes.

¹⁷Non correrán para el fontes de aceite, nin ríos de mel e manteiga.

¹⁸Terá que devolver os produtos sen os consumir, e non se gozará do que gañou mercando,

¹⁹pois oprimiu deixando espidos ós pobres e acaparou as casas que el non construíra.

²⁰Pois no seu corazón non coñeceu descanso e a súa cobiza non deixou fuxir ren;

²¹nada ficaba salvo do seu trabar, por iso non vai perdurar o seu deleite.

²²Da enchente vai pasar á angustia, botaráselle enriba a forza da desgraza.

²³Para que encha o seu ventre halle enviar Deus a súa ardente carraxe, fará chover por riba o lume do seu noxo.

²⁴Se foxe da arma de ferro alcánzao o arco de bronce;

²⁵A frecha sáelle polas costas, a punta da lanza polo fel; asáltano os terrores.

²⁶Todas as tebras están para el reservadas; un lume, non atizado por home, consómeo; mal lle vai ir a quen se refuxie na súa tenda!

²⁷O ceo ha pregoar o seu pecado, e contra el revolverase a terra.

²⁸Un torbón de auga desfaralle a casa, os torrentes do día da carraxe.

²⁹Este é o quiñón que ten Deus para o home impío, a herdanza divina para o rebelde!"