Read Biblia SEPT Xob 21 Bible Online

Xob 21 - Biblia SEPT bible

Xob 21

¹Entón Xob respondeu:

²—"Escoitade atentos o meu propósito: Que iso sexa para min o voso consolo!

³Aturádeme un intre mentres falo, cando remate xa vos mofaredes:

⁴Presento eu o meu agravio contra un home? Non teño razón para me impacientar?

⁵Ollade para min e estarrecede, e ponde a man na boca.

⁶Cando o penso, alporízome e apértanseme as carnes co medo:

⁷Como é que aínda viven os malvados e de vellos se cadra son máis ricos?

⁸A súa caste medra a carón deles; a súa prole, diante dos seus ollos.

⁹Nas súas casas hai paz, non hai temores, non bate nelas o fungueiro de Deus.

¹⁰O seu touro cobre a vaca sen fallar, a súa vaca pare sen abortar.

¹¹Deixan os seus nenos choutando coma años, bailan os seus pequenos;

¹²entoan ó ritmo do pandeiro e da cítola, fólganse ó son da frauta,

¹³transcorren os seus días na ledicia e baixan tranquilos ó Xeol,

¹⁴por máis que lle teñan dito a Deus: Arreda de nós, non queremos saber dos teus camiños!

¹⁵Quen é o Omnipotente para que o sirvamos? Que proveito tiramos de rogarlle?

¹⁶(Non teñen no seu control a súa prosperidade, non estou eu de acordo co matinar dos malvados).

¹⁷Cantas veces se lle apaga a candea ó impío? Cantas veces dá neles o malvado ou lles reparte Deus dores na súa ira

¹⁸ou se converten en palla diante do vento ou coma lixos que a treboada esparexe?

¹⁹Garda Deus a miseria para os seus fillos? Que lla faga pagar a el para que o sinta!

²⁰Que vexan os seus ollos a desfeita! Que beba a carraxe do Omnipotente!

²¹Pois que vai ser da súa casa despois del cando remate a conta dos meses?

²²Vai un darlle leccións a Deus que xulga ós máis egrexios?

²³Uns morren na plenitude das súas forzas, zumegando paz, e sen cavilacións,

²⁴cos lombos cheos de graxa e aínda mol a cana dos seus ósos;

²⁵morren outros fartos de amargor, sen gustar o que é bo,

²⁶e xuntos déitanos na mesma cinsa, cóbrenos ós dous os vermes.

²⁷Ben sei eu os vosos pensamentos e as opinións que contra min tecedes.

²⁸Dicides: Onde está o pazo do poderoso e onde a morada dos malvados?

²⁹Seica non o dades inquirido dos viandantes? Non o dades pescudado nas súas historias?:

³⁰Que nos días malditos se salva só o impío e se ceiba no día do furor.

³¹Quen lle bota en cara a súa conduta e o forza a pagar polo que fixo?

³²En troques, lévano solemnemente ó nicho, pónselle garda de honor no mausoleo;

³³sábenlle ben mesmo os terróns da cova, arrastra tras de si un xentío, e diante del desfilan a milleiros.

³⁴Como teimades entón consolarme tan en van? Das vosas respostas o que queda é fraude!"