Read Biblia SEPT Xob 28 Bible Online

Xob 28 - Biblia SEPT bible

Xob 28

¹"Ten por certo a prata unha veta e o ouro ten lugar para ser refinado.

²O ferro tírase da terra, e da pedra fundida sae o bronce.

³Póñenlle un tope á tebra e pescúdano todo ata os confíns, ata as rochas máis mouras e máis sinistras.

⁴Furan galerías lonxe dos casais, carreiros esquecidos polo pé; descenden pendurados, afástanse dos homes.

⁵A terra da que saen os alimentos ferve no fondo coma lume;

⁶eses penedos son as minas dos zafiros, neles atópanse as carabuñas do ouro.

⁷O seu vieiro non o coñece o voitre nin o dexerga o ollo do falcón;

⁸non o pisaron as máis altivas feras nin os leóns tripan nel.

⁹O home bótalle a man ó seixo, desfai os montes desde as raíces,

¹⁰nas rochas fende galerías co ollo atento para todo o de valía;

¹¹contén os mananciais dos regatos, tira á luz o escondido.

¹²Pero a sabedoría onde se atopa? Onde ten o seu posto a intelixencia?

¹³Non sabe o home da súa morada: non se atopa na terra dos viventes.

¹⁴Di o océano: Non está en min, e di o mar: Non vai comigo.

¹⁵Non se cambia por ouro, nin por ela se pon prata na pesa;

¹⁶non se paga co ouro de Ofir, co ónice de prezo ou con zafiros.

¹⁷Non a igualan nin o ouro nin o vidro, nin se troca por ánforas douradas;

¹⁸non contan para ela corais e cristal da rocha, e un saquiño de sabedoría vale máis cás perlas;

¹⁹non se emparella co crisólito de Etiopía, nin o ouro máis puro lle ten comparación.

²⁰De onde sae entón a sabedoría? Onde ten o seu posto a intelixencia?

²¹Está encuberta para todo ollo vivo, acochada mesmo das aves do ceo.

²²A Perdición e a Morte afirman: Cos nosos oídos escoitamos algo da súa sona.

²³É Deus quen sabe do seu camiño e quen coñece o seu posto,

²⁴pois el dexerga ata os confíns do mundo e olla todo o que existe baixo o ceo.

²⁵Ao pórlle peso ó vento e ó controlar as augas,

²⁶ó darlle lei á chuvia e un carreiro ó lóstrego da treboada:

²⁷foi entón cando a viu e a calculou, estableceuna despois de pescudar nela.

²⁸E díxolle ó home: Fíxate: o temor do Señor é sabedoría, e arredarse do mal é intelixencia".