Read Biblia SEPT Xob 32 Bible Online

Xob 32 - Biblia SEPT bible

Xob 32

¹Deixaron xa os tres homes de responder a Xob, coidando que era inocente.

²Pero encheuse entón de carraxe o Elihú, fillo de Baraquel o de Buz, do clan de Ram, alporizándose contra Xob, pola súa teima de levar a razón contra Deus.

³Deulle tamén a xenreira contra os tres amigos, pois non atoparan resposta, deixando a Deus por culpado.

⁴Aturara Elihú a Xob mentres aqueles falaban, pois eran os seus maiores,

⁵mais ó se decatar que ningún deles tres daba contestación, acendeuse de ira

⁶e empezou o seu discurso Elihú, fillo de Baraquel o buzita, dicindo: —"Eu son aínda novo e vós sodes anciáns, por iso tiven reparo e medo de exporvos o meu saber.

⁷Pensei para min: Xa falarán os de idade; os de moitos anos han mostrar a súa sabenza.

⁸Pero é un espírito no home, un alento do Omnipotente, o que dá a intelixencia.

⁹Non fai sabio o ser vello nin os anciáns cobran máis xuízo.

¹⁰Coido, logo, que tedes que escoitarme; tamén eu hei expor o meu saber.

¹¹Vede, eu agardei mentres falabades, e ben atento estiven ás vosas razóns mentres procurabades as verbas,

¹²e por máis que vos considerei, ninguén de vós corrixiu a Xob refutando os seus ditos.

¹³E non me veñades dicindo: Nós temos a verdade; a el xa o refugará Deus, e non un home.

¹⁴Aínda non discutiu comigo as súas razóns nin vou eu responderlle coas vosas verbas.

¹⁵Achantaron eles sen engadiren ren; Fuxíronlles as palabras.

¹⁶Pero seica vou eu agardar cando eles xa non falan, cando eles fican quedos sen replicar de novo?

¹⁷Voulle contestar da miña parte e exporlle tamén eu o meu saber:

¹⁸que estou cheo de razóns e a inspiración púxame por dentro.

¹⁹Velaquí o meu corazón: é coma viño pechado que fai estoupar os foles novos:

²⁰hei falar para me dar un respiro, abrirei os meus labios coa resposta.

²¹Non me porei da parte de ningún e a ninguén vou agasallar,

²²pois non sei adular; se tal fixese, léveme o creador.