Read Biblia SEPT Xob 34 Bible Online

Xob 34 - Biblia SEPT bible

Xob 34

¹Seguía falando Elihú e dixo:

²—"Sabios, escoitade as miñas verbas, dádeme oídos os que moito sabedes!

³Igual que a orella pode distinguir palabras e o padal saborea o que come,

⁴podemos nós probar o que é dereito recoñecer por nós o que sexa bo.

⁵Foi Xob mesmo quen dixo: Son inocente, é Deus quen cambia o meu dereito;

⁶Aínda que teño a razón, paso por trouleiro; vou ferido de frecha sen culpa da miña parte.

⁷Que home hai coma Xob que beba o escarnio coma auga,

⁸sempre de camiño para a xuntanza dos malfeitores, sempre na rúa a carón dos malvados?

⁹Di para si: Non trae vantaxe ningunha o darlle gusto a Deus.

¹⁰Por iso, vós, asisados, oíde: lonxe de Deus o ser culpable, lonxe do Omnipotente o obrar inxusto,

¹¹xa que conforme fai o home así paga, e segundo a súa conduta retribúeo.

¹²Abofé que Deus non pode obrar o mal e que o Omnipotente non torcerá o dereito.

¹³Quen lle encomendou a El a terra e quen lle decretou o cargo do universo?

¹⁴Con só que El decidise retirar o seu espírito e o seu alento,

¹⁵Afogarían todos os viventes e o ser humano volvería ó po.

¹⁶Se tes entendemento, escoita isto, presta atención ó son das miñas verbas:

¹⁷Podería gobernar quen refuga o dereito? Condenarías ti a quen é xusto e poderoso?

¹⁸Chamarías ti badoco ó rei e diríaslles ós nobres criminais?

¹⁹A El, que cos principais non ten favoritismo, que non se pon da parte do podente contra o pobre, pois todos eles son obra das súas mans.

²⁰Morren de súpeto á media noite, expiran os podentes e pasan; o forte cede o posto sen que o toque ningunha man.

²¹Pois os seus ollos dexergan os vieiros humanos albiscando todos os seus pasos;

²²non hai sombra nin tebras onde os malfeitores poidan acochar,

²³xa que Deus non lle dá ó home un prazo para vir onda El a xuízo.

²⁴Desfai os violentos sen máis enquisas e no seu posto dálles o cargo a outros,

²⁵porque pescuda todos os seus feitos trastornándoos de noite ata os esnaquizar;

²⁶malla neles como se estivesen presos, onde todos os vexan,

²⁷por deixaren de seguilo e por non matinaren nos seus camiños,

²⁸facendo chegar a El os salaios dos pobres, facéndolle escoitar os choros dos oprimidos.

²⁹E se El fica inmóbil, quen o moverá? e cando esconde a face, quen o contemplará, a El que vela sobre as nacións e os homes

³⁰para que non reine o inicuo nin lle poña trampas ó pobo?

³¹Terá Deus que dicirche: Errei, mais non tornarei facer o mal;

³²non vin o que facía, ensíname ti; e se obrei o mal, non o repetirei?

³³Ha de retribuír El coma ti pensas cando condenas, xa que es ti quen decide e non eu? Fala, se tanto sabes!

³⁴Mais homes asisados hanme responder xunto cos sabios que me escoiten:

³⁵Xob está a falar do que non sabe e as súas razóns van sen xeito.

³⁶Deberá ser probado Xob ata o remate por contestar como fan os impíos,

³⁷pois engade outra culpa ó seu pecado e aínda fai festas diante de nós multiplicando verbas contra Deus".