Read Biblia SEPT Xob 37 Bible Online

Xob 37 - Biblia SEPT bible

Xob 37

¹Por iso o meu corazón treme e sáltame fóra do sitio.

²Oíde o son da súa voz tronante, o balbordo que sae da súa boca!

³Dispara o raio por embaixo do ceo e chega o lóstrego ata os confíns da terra;

⁴tras del vén o bruar do trono retumbando coa alteza da súa voz; non se contén o lóstrego cando se empeza a oír a treboada.

⁵Amósanos Deus as súas marabillas, fai prodixios que nós non comprendemos.

⁶Dille á neve: Cae no chan! ó orballo e á chuvia: Sede fortes!

⁷Encerra os homes todos coma nun curro, para que a humanidade coñeza os seus feitos.

⁸As feras foxen para os seus recunchos, acochábanse nos seus cubís;

⁹sae a galerna da súa alcoba e a xeada dos seus piornos;

¹⁰co sopro divino fórmase o xeo e calla todo ó longo das augas;

¹¹Tamén é El quen lles dá humidade ás nubes e fai xurdir o raio dos nubeiros,

¹²que se moven arredor e van e veñen segundo os goberne, cumprindo todos os seus mandatos sobre a face do orbe:

¹³sexa para castigar coa vara, sexa para favorecer, eles sempre dan no fito.

¹⁴Escoita todo isto, Xob, ponte en pé e pescuda as marabillas de Deus!

¹⁵Entendes ti como dispón Deus deles todos e como fai brillar os lóstregos no nubeiro?

¹⁶Que sabes ti do cimbrarse das nubes, marabilla dunha ciencia insondable?

¹⁷Ti, a quen xa queima o vestido, cando a terra adormece baixo o vento do sur.

¹⁸Tendiches ti con El a cúpula celeste, impenetrable coma un espello fundido?

¹⁹Aconséllanos ti o que lle teñamos que dicir! Non atopamos razóns na nosa ignorancia.

²⁰Coidas que o informarán, se eu lle quero falar; que llo comunican cando un home di algo?

²¹Se xa agora non hai quen mire o sol cando resplandece no ceo ó pasar o vento e varrelo!

²²Do norte vén un resplandor dourado, a tremenda maxestade arredor de Deus!

²³Nós non alcanzamos ó Omnipotente, que é sublime en poder e dereito e non destrúe a súa Orde grandiosa!

²⁴Por iso tremen ante El todos os humanos e non ten en conta ós que se cren sabios".