Read Biblia SEPT Xob 38 Bible Online

Xob 38 - Biblia SEPT bible

Xob 38

¹Entón respondeulle Iavé desde o trebón:

²—"Quen é este que escurece o meu plan cunha leria sen tino?

³Cingue os lombos coma un home! Vouche preguntar para que ti me ensines:

⁴Onde estabas cando fundei a terra? Dimo, se tes tanto siso!

⁵Quen lle deu as proporcións, se é que o sabes? ou quen lle tendeu por riba a corda de medir?

⁶Onde afincan os seus alicerces? Quen colocou a súa pedra angular

⁷entre o choutar dos luceiros do abrente e os aturuxos dos seres celestes?

⁸Quen pechou os portóns do mar ó xurdir debruzándose do seo materno,

⁹cando lle impuxen coma embozo as brétemas e o envolvín en néboas coma panos?

¹⁰Daquela marqueille os límites e asegureille os ferrollos e as portas,

¹¹e díxenlle: Ata aquí has chegar e non pasar. Aquí han rematar as túas altas ondas.

¹²Cando, na túa vida, mandaches no abrente ou lle fixeches saber o seu lugar á aurora,

¹³para que aferrase a terra polas abas e sacudise dela ós malvados,

¹⁴para que tome forma coma a arxila baixo o selo e se tinga de cor coma a roupa;

¹⁵para que se lles negue ós impíos a luz e se lle rompa o brazo ó malvado?

¹⁶Teste achegado ós mananciais do mar? Paseácheste pola canle do océano?

¹⁷Descubríronseche os cancelos da morte? Ollaches os portóns das tebras?

¹⁸Pescudaches ti as longuras da terra? Cóntamo se é que o sabes todo!

¹⁹Cal é o camiño onde mora a luz e onde habita a tebra,

²⁰para que as poidas levar ata os seus eidos, coñecendo os vieiros do seu casal?

²¹Tal debes ti saber, pois xa para entón naceras e a cifra dos teus anos son milleiros!

²²Achegácheste ós celeiros da neve, axexaches nos piornos da sarabia,

²³que eu conservo para o tempo da aflición e para o día da loita e da guerra?

²⁴Onde é o lugar no que se parte o vento? Onde se esparexe o soán pola terra?

²⁵Quen lles arou a canle ás chuvieiras e o vieiro ás chispas da treboada,

²⁶para que chova na campía erma, na estepa onde non hai ninguén,

²⁷fartando así páramos e desertos, para que agromen as herbas na estepa?

²⁸Ten pai a chuvia? ou quen xerou as pingotas do orballo?

²⁹De que ventre saíu o xeo ou quen pariu a xeada do ceo,

³⁰cando a auga endurece coma pedra e se conxela a superficie do océano?

³¹Es ti quen amarra as cadeas das Pléiades ou quen desata os lazos do Orión?

³²Fas ti xurdir ó seu tempo a Coroa ou guías ti a Osa cos seus fillos?

³³Coñeces ti por caso a lei do ceo ou decretas as normas que van rexer na terra?

³⁴Erguerás ti a voz ata as nubes para que un ballón de auga te alague?

³⁵Mandas ti nos lóstregos, e vanse para dicirche ó remate: xa estamos de volta?

³⁶Quen lle deu a sabedoría ó ibis e o seu instinto ó galo?

³⁷Quen conta sabiamente as nubes? e quen envorca as sellas do ceo

³⁸cando o po se funde en lama e se apegan os terróns os uns cos outros?

³⁹Cázaslle ti a presa da leoa ou fártaslle a fame dos cachorros,

⁴⁰cando acochan nas súas covas ou axexan deitados entre as silvas?

⁴¹Quen lle asegura ó corvo a súa mantenza, cando berran a Deus as súas crías toleando por non teren que comer?