Read Biblia SEPT Xob 4 Bible Online

Xob 4 - Biblia SEPT bible

Xob 4

¹Respondeu Elifaz o temanita:

²—"Se un se atreve a falarche, aturaríalo? Mais quen pode xa frear as palabras!

³Velaí, ti que ensinaches a moitos e reforzaches tantos brazos febles,

⁴que erguiches coas túas palabras ós caídos, e sostiñas os xeonllos que amolecían,

⁵cando che chega a ti, xa non o sofres; tócache a ti, e túrbaste.

⁶Non é entón a piedade a túa fianza e a túa esperanza o teu vivir honrado?

⁷Fai memoria: quen sendo inocente morreu? Onde se viu que perecesen os xustos?

⁸O que eu vexo é que os que labran malicias e os que sementan coitas, tamén as collen:

⁹co sopro de Deus logo esmorecen, coa treboada da súa ira consómense.

¹⁰Urra o león e brada a cría, os dentes dos cachorros son quebrados.

¹¹Morre o león sen atopar presa e esparéxense as crías da leoa.

¹²Chegoume ás agachadas unha verba, percibiu o meu oído o seu murmurio,

¹³nun pesadelo, nas visións noitébregas, cando cae o sopor sobre os homes.

¹⁴Achegáronseme o pavor e o temor, treméronme de medo os ósos todos.

¹⁵Un espírito pasou diante de min; arrepiáronseme na pel os pelos.

¹⁶Estaba alí —eu non o coñecía— unha figura diante dos meus ollos; fíxose a calma; entón oín a voz:

¹⁷Terá un home máis razón ca Deus? Será máis puro o humano ca quen o fixo?

¹⁸Se aínda dos seus servos El non fía e atopa erros mesmo nos seus anxos,

¹⁹canto máis nos que moran en casopas de lama e que teñen no po os seus fundamentos, que se poden esmagar coma a traza!

²⁰Entre a mañá e a noite esmáganos, morren para sempre sen se decataren;

²¹Arríncanlles tamén as cordas da tenda; perecen sen saberen como!