Read Biblia SEPT Xob 5 Bible Online

Xob 5 - Biblia SEPT bible

Xob 5

¹Chama a ver quen che responde! A que santo te vas ofrecer?

²Pois é a carraxe a que mata ó tolo e a envexa a que dá morte ó parvo.

³Vin eu un tolo botar raigañas, pero de súpeto podreceulle o casal;

⁴os seus fillos non teñen axuda: asobállanos no tribunal da porta sen ninguén que os defenda;

⁵un famento calquera cómelles a colleita roubándollela por entre os toxos, e os sedentos zúganlles os seus bens.

⁶Pois non agroma de entre o po a maldade nin é que a desgraza xermole da terra;

⁷máis ben é o home quen nace para a desgraza, como reloucan as faíscas no aire.

⁸Eu no teu lugar rogaríalle a Deus, poría a miña causa nas súas mans.

⁹El é quen fai o grande, o insondable, el fai milagres sen conta;

¹⁰quen bota a chuvia sobre a face da terra e envía as augas sobre os terróns;

¹¹pon no alto ós humildes e os tristes achan nel o seu acougo.

¹²El desfai as matinacións dos arteiros para que as súas obras non logren o éxito.

¹³El enreda os sabidos nas súas artes precipitando os plans dos falsarios:

¹⁴é polo día, e van dar nas tebras; é mediodía, e apalpan coma á noite.

¹⁵El salva ó pobre dos labios coma espadas, e da man do poderoso.

¹⁶O coitado gaña nova esperanza e tápaselle a boca á iniquidade.

¹⁷Benia o home a quen Deus corrixe: non rexeites a proba do Omnipotente!

¹⁸Porque se el fere, tamén pon a venda; se che dá un golpe, a súa man sándao.

¹⁹Hate librar de seis calamidades e na sétima o mal xa non te atinxe;

²⁰nunha gran fame céibate da morte e na guerra, do fío das espadas;

²¹do azoute da lingua haste reparar, non terás medo ó estrago, se é que chega;

²²rirás do estrago e mais da fame, non temerás as feras da campía;

²³terás concerto cos espíritos das agras e paz coas feras da fraga;

²⁴saberás o que é paz na túa tenda; percorrerás os eidos sen botares cousa en falta;

²⁵ollarás como medra a túa familia, será a túa proxenie coma o grelar das leiras;

²⁶e baixarás rufo á cova na vellez, cal van dar no celeiro os monllos ó seu tempo.

²⁷Isto é así, que o temos pescudado; xa o escoitaches: agora dálle voltas".