Read Biblia SEPT Xob 7 Bible Online

Xob 7 - Biblia SEPT bible

Xob 7

¹O home ten na terra unha duro labor; os seus días son coma os do xornaleiro.

²Coma o escravo que arela a sombra, coma o xornaleiro que agarda o que gañou:

³Así herdei eu meses baldeiros e tocáronme en sorte noites de angustia.

⁴Penso para min ó deitarme: cando me hei erguer? e desde o mesmo serán énchome de inquedanza ata o abrente.

⁵Vestiuse a miña carne de vermes, dunha cotra de terra; a miña pel regaña e supura.

⁶Os meus días correron máis axiña cá lanzadeira de tecer e foxen sen esperanza.

⁷Recorda ben que a miña vida é vento, e que o meu ollo non verá máis a ledicia!

⁸Pois non me dará visto un ollo humano, e cando ti me espreites, xa non estarei.

⁹Coma unha nube que se desfai e pasa, así non sobe o que baixa para o Xeol.

¹⁰Non volverá de novo ós seus eidos e o seu lar non saberá máis del.

¹¹Non hei, por iso, de pórlle freo á boca, e falarei con ánimo angustiado; voume laiar desde o amargor da alma:

¹²Son eu o mar ou o dragón mariño para que poñas vixía contra min?

¹³Cando penso: vaime aliviar o leito, a miña cama amainará o meu choro,

¹⁴vés ti e arrepíasme cos soños, espántasme con visións de pesadelo;

¹⁵tal que case escollera eu morrer aforcado e prefiren a morte os meus ósos.

¹⁶Xa estou canso! Non vou vivir para sempre: Déixame xa, que son un sopro os meus días!

¹⁷Que é o home para que tanto o consideres, para que del así te ocupes,

¹⁸para que o poñas á proba cada mañá, para estares controlándoo a cada intre?

¹⁹Cando vas tirar a vista de riba de min e me deixarás sequera tragar o cuspe?

²⁰Se por caso pequei, que é o que che fixen a ti, Garda—homes? Para que me apuntas coma un branco? Por que son para ti unha carga?

²¹Por que non perdoas a miña culpa e deixas pasar o meu pecado? Entón podería deitarme no po e por máis que me procurases, xa non existiría".