Read Biblia SEPT Salmos 102 Bible Online

Salmos 102 - Biblia SEPT bible

Salmos 102

¹Laios dun home aflixido, que expón a súa queixa ante o Señor.

²Señor, escoita a miña súplica, chegue a ti o meu clamor.

³Non me escondas o teu rostro no día do apuro. Pon cara a min o oído e, cando te chame, respóndeme axiña.

⁴Os meus días esvaecen coma o fume, os meus ósos queiman coma as ascuas;

⁵o meu corazón está murcho, seco coma o feo, e mesmo de comer o pan me esquezo.

⁶A forza de xemer, a pel apégaseme ós ósos.

⁷Estou como a curuxa do deserto, coma o moucho nas ruínas.

⁸Ando sen tocar o sono, coma paxaro senlleiro no tellado.

⁹Os inimigos aldráxanme decote, e xuran coma loucos contra min.

¹⁰En vez de pan como cinsa e mesturo coas bágoas a bebida.

¹¹Con noxo e indignación érguesme en alto e tírasme.

¹²Os meus días son coma sombra alongada, estou seco coma o feo.

¹³Pero ti, Señor, manteste por sempre; o teu recordo, por todas as idades.

¹⁴Ergueraste e apiadaraste de Sión, pois é tempo de ter dó dela, e a hora xa chegou.

¹⁵Os teus servos téñenlles cariño ás súas pedras, teñen dó das súas ruínas.

¹⁶As xentes temerán o nome do Señor, os reis da terra a súa gloria,

¹⁷cando o Señor reconstrúa Sión e se mostre na súa gloria;

¹⁸cando o Señor atenda a oración dos espoliados e non desprece a súa pregaria.

¹⁹Isto escribirase para as xeracións vindeiras, e o pobo entón creado loará ó Señor.

²⁰O Señor olla desde o seu santuario excelso, desde o ceo mira para a terra.

²¹Escoita o pranto dos cativos, libra os condenados á morte.

²²En Sión falarase do nome do Señor, en Xerusalén da súa gloria,

²³cando pobos e reinos se xunten para daren culto ó Señor.

²⁴A miña forza deveceu no camiño, os meus días minguaron.

²⁵E digo: —"Meu Deus, non me leves no medio dos meus días; os teus anos duran por todas as idades.

²⁶O comezo asentaches a terra e os ceos son obra das túas mans.

²⁷Eles pasan, mais ti quedas; gástanse coma a roupa, coma un traxe que se muda;

²⁸pero ti es o mesmo, os teus anos non acaban.

²⁹Os fillos dos teus servos estableceranse, a súa posteridade estará segura á túa vista".