Read Biblia SEPT Salmos 103 Bible Online

Salmos 103 - Biblia SEPT bible

Salmos 103

¹De David. Alma miña, bendice ó Señor e todo o meu ser, o seu santo nome.

²Alma miña, bendice ó Señor, non esquezas os seus beneficios.

³El perdoa as túas culpas e sanda as túas doenzas;

⁴rescata a túa vida da morte e coróate de amor e de tenrura;

⁵farta de bens a túa existencia e renova coma a da aguia a túa mocidade.

⁶O Señor fai xustiza e defende o dereito do oprimido.

⁷Mostroulle a Moisés os seus camiños, ós fillos de Israel as súas fazañas.

⁸O Señor é misericordioso e clemente, tardo á ira e rico en mercés.

⁹Non contende por moito tempo nin se anoxa para sempre.

¹⁰Non nos trata conforme ós nosos erros nin nos paga conforme ás nosas culpas.

¹¹Canto se alza o ceo sobre a terra, así é grande o seu amor para os que o temen;

¹²canto dista o nacente do poñente, así arreda de nós as nosas culpas;

¹³canto un pai ama ós seus fillos, así ama o Señor ós que o temen.

¹⁴El sabe de que estamos feitos, recorda que somos lama.

¹⁵Os días do home son coma o feo, o seu florecer coma o da flor:

¹⁶Aínda non a roza o vento, xa se foi, e o seu sitio xa non a volve a ver.

¹⁷Mais para os que o temen, o amor do Señor dura por sempre, a súa xustiza chega ós fillos e ós netos

¹⁸dos que gardan a súa alianza, dos que recordan os seus mandatos e os cumpren.

¹⁹O Señor asentou no ceo o seu trono e o seu reino goberna o universo.

²⁰Bendicide o Señor, os seus anxos, seres poderosos ás súas ordes, que obedecedes a súa palabra.

²¹Bendicide ó Señor, os seus exércitos, servidores que facedes a súa vontade.

²²Bendicide ó Señor, as súas obras, en todos os lugares do seu reino. Alma miña, bendice o Señor.