Read Biblia SEPT Salmos 107 Bible Online

Salmos 107 - Biblia SEPT bible

Salmos 107

¹Loade o Señor, que é bo e o seu amor é eterno.

²Dígano os redimidos do Señor, os que El redimiu da man dos opresores

³e reuniu de todos os países, do nacente e do poñente, do norte e do sur.

⁴Errando polo deserto solitario, non atopaban camiño de cidade habitable.

⁵Famentos e sedentos, encollíaselles o espírito.

⁶No apuro clamaron ó Señor e El librounos da aflición.

⁷Levounos por camiño dereito cara a unha cidade habitable.

⁸Dean grazas ó Señor pola súa misericordia, polos seus prodixios cos humanos.

⁹El sacia ós sedentos e farta de bens ós famentos.

¹⁰Xacían na escuridade e nas tebras, presos de coitas e ferro,

¹¹por se teren rebelado contra a palabra de Deus e desprezado o consello do Altísimo.

¹²Aflixiunos El con traballos, e eles cambaleaban, sen ninguén que lles valese.

¹³No apuro clamaron ó Señor e El librounos da aflición.

¹⁴Sacounos da escuridade e das tebras e rompeu as súas cadeas.

¹⁵Dean grazas ó Señor pola súa misericordia, polos seus prodixios cos humanos.

¹⁶El rompeu as portas de bronce e esnaquizou os ferrollos.

¹⁷Doentes polos seus erros, aflixidos polas súas culpas,

¹⁸dáballes noxo a comida e andaban ás portas da morte.

¹⁹No apuro clamaron ó Señor e El librounos da aflición.

²⁰Mandou a súa palabra e sandounos, rescatounos da perdición.

²¹Dean grazas ó Señor pola súa misericordia, polos seus prodixios cos humanos.

²²Ofrézanlle sacrificio de loanza e pregoen con xúbilo os seus feitos.

²³Os que baixan nos barcos ó mar, para facer o seu traballo nas augas abismais,

²⁴poden ver os feitos do Señor, os seus prodixios no océano.

²⁵Cun aceno del érguese o vento de temporal e levántanse fortes as ondas:

²⁶érguense cara ó ceo e caen no abismo. Co estómago revolto, mareados,

²⁷dan voltas coma borrachos: toda a súa pericia queda en nada.

²⁸No apuro clamaron ó Señor e El librounos da aflición.

²⁹El troca a tempestade en brisa lene, e quedan caladas as ondas.

³⁰Alégranse eles coa calma, e El lévaos ó porto arelado.

³¹Dean grazas ó Señor pola súa misericordia, polos seus prodixios cos humanos.

³²Celébreno na asemblea do pobo, lóeno na xunta dos anciáns.

³³El converte os ríos en deserto, o manancial en terra reseca;

³⁴A terra vizosa en salinas, pola maldade dos moradores.

³⁵El cambia o deserto en lagoa e a terra seca en manancial.

³⁶Asenta alí os famentos, e fundan cidade para habitar.

³⁷Sementan agros, plantan viñas e recollen os froitos.

³⁸Dálles as bendicións, e van a máis e as súas facendas non minguan.

³⁹Se minguasen e fosen abatidos, sería polo peso da malicia e das ansias.

⁴⁰O que bota desprezos sobre os grandes e os fai errar por unha soidade sen camiños,

⁴¹ergue os pobres da miseria e acrecenta coma rabaños as súas casas.

⁴²O velo, alégranse os rectos, mentres que a iniquidade pecha a súa boca.

⁴³O sabio terá en conta isto, entenderá a misericordia do Señor.