Read Biblia SEPT Salmos 108 Bible Online

Salmos 108 - Biblia SEPT bible

Salmos 108

¹Cántiga, salmo de David.

²O meu corazón está disposto, meu Deus: quero cantarche e loarte. Espertade, miñas entrañas,

³espertade, cítola e arpa: eu quero cantar coa aurora.

⁴Loareite, Señor, diante dos pobos, cantareiche diante das nacións.

⁵O teu amor é máis alto có ceo, a túa fidelidade chega ata as nubes.

⁶Érguete, Deus, sobre o ceo, enche a terra da túa gloria.

⁷Para que os teus amigos sexan liberados, socórrenos coa salvación da túa dereita.

⁸O Deus santo tiña dito: —"Cantarei triunfo, partirei Xequem, parcelarei o val de Succot,

⁹Meu é Galaad, meu Menaxés, helmo da miña cabeza é Efraím, e Xudá o meu cetro.

¹⁰Moab é o estanque en que me baño, sobre Edom poño a sandalia e canto vitoria sobre Filistea".

¹¹Quen me levará a unha praza forte? Quen me guiará ata Edom?

¹²Quen, se non ti, Deus, que nos tes rexeitados e xa non saes, Deus, co noso exército?

¹³Axúdanos ti no apuro, pois inútil é a axuda dos homes.

¹⁴Con Deus faremos fazañas, El esmagará os nosos opresores.