Read Biblia SEPT Salmos 109 Bible Online

Salmos 109 - Biblia SEPT bible

Salmos 109

¹Do mestre do coro. Salmo de David. Deus a quen loo, non cales,

²pois ábrense contra min bocas malvadas e dolosas. Falan de min con lingua mentireira,

³cércanme con palabras de odio, combátenme sen razón.

⁴En pago do meu amor eles acúsanme, mentres eu estou rezando.

⁵Vólvenme mal por ben, xenreira por amor.

⁶Apurra contra el a un malvado, que teña á súa dereita un acusador.

⁷Que no xuízo saia condenado e a súa apelación se converta en culpa.

⁸Que os seus días se acurten e que outro colla o seu posto.

⁹Que queden orfos seus fillos e viúva súa muller.

¹⁰Que seus fillos vaian errantes e pedindo, e que os boten das súas ruínas.

¹¹Que os acredores collan os seus bens e xente allea rapine o froito do seu traballo.

¹²Que ninguén teña dó del, ninguén se apiade dos seus orfos.

¹³Que a súa posteridade sexa arrincada e que se borre o seu nome nunha xeración.

¹⁴Que o Señor teña en conta as culpas do pai e que non borre os pecados da nai.

¹⁵Que o Señor os teña diante e que tache da terra a súa memoria.

¹⁶Xa que nunca pensou en facer ben, perseguiu ó pobre e ó humilde, e empurrou á morte o angustiado.

¹⁷Xa que prefire a maldición, que veña sobre el, xa que non quere bendición, que se lle aparte.

¹⁸Véstese de maldición coma dun traxe: que coma a auga lle entre nas entrañas, coma o aceite nos ósos;

¹⁹que sexa o manto que o cobre, e o cinguideiro que o cingue!

²⁰Dea o Señor este pago ós que me acusan, ós que pronuncian calumnias contra min.

²¹Pero ti, Señor, o meu dono, actúa, polo teu nome, en favor meu, líbrame, conforme ó teu amor.

²²Eu son humilde e pobre, e co corazón ferido.

²³Voume coma a sombra que devala, espantado, como a lagosta.

²⁴Os meus xeonllos cambalean co xaxún, o meu corpo anda esmorecido.

²⁵Fan burla de min, ó verme, abanean a cabeza.

²⁶Señor, meu Deus, axúdame, sálvame, conforme ó teu amor.

²⁷Saberase que a túa man está aquí e que es ti, Señor, quen o fai.

²⁸Que maldigan, con tal que ti bendigas: ergueranse eles para vergonza, mentres se alegra o teu servo.

²⁹Vestiranse de vergonza os meus acusadores, cubriranse de confusión coma dun manto.

³⁰Eu dareille as grazas ó Señor, loareino ante a multitude.

³¹El ponse á dereita dos pobres para os librar dos seus xuíces.