Read Biblia SEPT Salmos 116 Bible Online

Salmos 116 - Biblia SEPT bible

Salmos 116

¹Amo ó Señor que escoita a miña voz suplicante,

²e pon cara a min o seu oído no día en que o chamo.

³Cando me envolven lazos de morte e as redes do abismo me atrapan; cando me atopo en apuro e aflición,

⁴invoco o nome do Señor: Ai, Señor, sálvame a vida!

⁵O Señor é xusto e clemente, o noso Deus é compasivo.

⁶O Señor garda os humildes: na miña febleza hame socorrer.

⁷Alma miña, recobra o sosego, pois o Señor cumpre contigo.

⁸Ti libras da morte a miña vida, os meus ollos das bágoas, os meus pés da caída.

⁹Camiñarei á vista do Señor na terra da vida.

¹⁰Confío, aínda que diga: —"Eu son un desgraciado".

¹¹E no meu apuro digo: —"Todo enganos son os homes".

¹²Con que lle pagarei ó Señor todo o ben que me fai?

¹³Alzarei a copa da salvación, invocando o nome do Señor;

¹⁴cumprirei os meus votos ó Señor, á vista de todo o seu pobo.

¹⁵Moi custosa é ós ollos do Señor a morte dos seus amigos.

¹⁶Ai, Señor, que eu son o teu servo, servo teu e fillo da túa serva, a quen ti rompiches as cadeas!

¹⁷Ofrézoche sacrificios de loanza, invocando o nome do Señor.

¹⁸Cumprirei os meus votos ó Señor, á vista de todo o seu pobo,

¹⁹nos adros da casa do Señor, no medio de ti, Xerusalén, Aleluia.