Read Biblia SEPT Salmos 132 Bible Online

Salmos 132 - Biblia SEPT bible

Salmos 132

¹Cántiga das subidas. Señor, tenlle en conta a David as súas moitas aflicións,

²cando xurou ó Señor e fixo este voto ó Deus de Xacob:

³—"Non entrarei na miña casa nin subirei ó leito do repouso,

⁴non concederei sono ós meus ollos nin acougo ás miñas pálpebras,

⁵Ata lle atopar sitio ó Señor, morada ó Deus de Xacob".

⁶Oímos dela en Efrátah, atopámola nos campos de Iáar.

⁷Entremos na súa morada, prostrémonos perante o estrado dos seus pés.

⁸Érguete, Señor, cara á túa mansión, ti e mais a Arca da túa maxestade.

⁹Que os teus sacerdotes vistan de festa e os teus devotos relouquen.

¹⁰Por mor do teu servo David, non desdeñes o teu unxido.

¹¹O Señor xuroulle a David —promesa da que non renega—: —"Prole da túa liñaxe porei sobre o teu trono.

¹²Se teus fillos gardan a miña alianza e este precepto que lles ensino, tamén os fillos deles por sempre sentarán no teu trono".

¹³O Señor elixiu a Sión e quíxoa por morada:

¹⁴—"Esta será para sempre a miña casa, habitarei nela, porque a quero.

¹⁵Bendicirei as súas provisións, fartarei de pan os seus pobres;

¹⁶vestirei os seus sacerdotes de festa e reloucarán os seus devotos.

¹⁷Alí farei florecer o vigor de David, acendereille ó meu unxido unha lámpada.

¹⁸Cubrirei de confusión os inimigos, mentres brilla sobre el a diadema".