Read Biblia SEPT Salmos 138 Bible Online

Salmos 138 - Biblia SEPT bible

Salmos 138

¹De David. Douche as grazas, Señor, de todo corazón, cántoche diante dos anxos;

²póstrome cara ó teu templo e bendigo o teu nome, polo teu amor e a túa fidelidade. Mesmo máis grande cá túa sona fixeches a túa promesa.

³Cando te chamo, ti respóndesme e acrecentas as miñas forzas.

⁴Daranche as grazas, Señor, todos os reis da terra, cando oian os ditos da túa boca.

⁵Cantarán os camiños do Señor, pois grande é a gloria do Señor.

⁶Abofé, o Señor é excelso: pon a súa atención nos humildes e coñece os soberbios desde lonxe.

⁷Cando me vexo en apuro, ti consérvasme a vida. Contra o furor dos meus inimigos estendes a túa man, a túa dereita libérame:

⁸o Señor leva ata o final a miña causa. O teu amor, Señor, é eterno; non abandones as obras das túas mans.