Read Biblia SEPT Salmos 139 Bible Online

Salmos 139 - Biblia SEPT bible

Salmos 139

¹Do mestre do coro. Salmo de David. Señor, ti escúlcasme a fondo e coñécesme ben,

²ti sabes cando sento e me levanto, penetras nos meus pensamentos desde lonxe.

³Ti distingues cando me movo e cando estou quedo e os meus camiños sonche todos familiares.

⁴Aínda non está na miña lingua a palabra e xa ti, Señor, a coñeces enteira.

⁵Envólvesme por detrás e por diante, e sobre min tes posta a túa man.

⁶Admirable por demais me resulta este saber, tan alto que non o alcanzo.

⁷Onde me podería arredar do teu alento? A onde fuxir da túa ira?

⁸Se subo ó ceo, alí estás; se baixo ó abismo, estás presente.

⁹Se me ergo nas ás da aurora e emigro ó extremo dos mares,

¹⁰Ata alí me leva a túa man e me colle a túa dereita.

¹¹Se digo: —"Que polo menos me encubran as tebras e a luz ó meu arredor se faga noite",

¹²As mesmas tebras non son para ti escuras e a noite éche clara coma o día: tanto che ten a luz coma as tebras.

¹³Ti formaches as miñas entrañas, tecíchesme no seo da miña nai.

¹⁴Lóuvote polo prodixio que hai en min: as túas obras son marabillosas. Ti coñeces a fondo o meu espírito;

¹⁵non che estaba oculta a miña esencia, cando no segredo era formado, tecido no fondo da terra.

¹⁶O meu embrión víano os teus ollos, e escribíanse xa no teu libro os días todos que habían vir, sen que existise aínda o primeiro.

¹⁷Que preciosos atopo, Deus, os teus proxectos! Que grande o seu conxunto!

¹⁸Se os quixese contar, son máis cá area, se chegase ata a fin, quedarías ti aínda.

¹⁹Se bateses, Deus, nos malvados, se arredasen de min os sanguinarios!

²⁰Arrepóñense contra ti arteiramente e nomean en van os teus proxectos.

²¹Non hei de odiar os que te odian, aborrecer os que se erguen contra ti?

²²Odioos con odio cumprido e téñoos por inimigos meus.

²³Examíname a fondo, Deus; coñece o meu corazón; próbame, e coñece os meus sentimentos.

²⁴Olla se é torto o meu camiño, guíame ti polo camiño eterno.