Read Biblia SEPT Salmos 143 Bible Online

Salmos 143 - Biblia SEPT bible

Salmos 143

¹Salmo de David. Escoita, Señor a miña oración, pola túa fidelidade, atende a miña súplica, respóndeme, pola túa xustiza.

²Non veñas a xuízo co teu servo, pois ningún home vivo é xusto ante ti.

³O meu inimigo perségueme de morte, tripa a miña vida polo chan; relégame ás tebras, coma ós xa mortos noutro tempo.

⁴O meu espírito encóllese en min, quédame xeado o corazón.

⁵Eu recordo os tempos pasados, considero os teus feitos e medito as accións das túas mans.

⁶Estendo as mans cara a ti: coma a terra reseca, a miña alma ten sede de ti.

⁷Respóndeme axiña, Señor, que me falta o alento. Non me escondas a túa cara, non me asemelle ós que baixan á cova.

⁸Faime sentir de mañá o teu favor, pois eu confío en ti. Ensíname que camiño collerei, pois cara a ti alzo a miña alma.

⁹Líbrame, Señor, dos meus inimigos, pois eu acóllome a ti.

¹⁰Apréndeme a facer a túa vontade, pois ti es o meu Deus. Que o teu alento bo me guíe por unha terra cha.

¹¹Polo teu nome, Señor, consérvame a vida, pola túa bondade tírame do apuro:

¹²pola túa misericordia destrúe os meus inimigos, extermina os que de morte me perseguen, pois eu son o teu servidor.