Read Biblia SEPT Salmos 144 Bible Online

Salmos 144 - Biblia SEPT bible

Salmos 144

¹De David. Bendito o Señor, a miña rocha, o que adestra as miñas mans para a loita, os meus dedos para a contenda.

²El é para min defensa e fortaleza, refuxio, escudo e agarimo, o que somete para min os pobos.

³Que é, Señor, o home, para que ti te ocupes del, o fillo do home, para que ti lle fagas caso?

⁴O home é coma un sopro; coma sombra que pasa, son os seus días.

⁵Abaixa, Señor, o ceo e descende, toca os montes e que ardan;

⁶fai relustrar e dispérsaos, lanza as túas setas e confúndeos.

⁷Tende a túa man desde a altura, deféndeme, líbrame das augas, do poder dos estranxeiros,

⁸que falan en van coa boca e enganan cos seus feitos.

⁹Eu cantareiche, Deus, un cantar novo, tocarei para ti a arpa de dez cordas.

¹⁰Ti que dá—la vitoria ós reis, que libraches o teu servo David da crúa espada,

¹¹deféndeme, líbrame da man dos estranxeiros, que falan en van coa boca e enganan cos seus feitos.

¹²Que os nosos fillos sexan coma plantas vizosas na súa mocidade, e as nosas fillas coma columnas angulares, talladas para ornato dos pazos.

¹³Que os nosos hórreos se enchan e ateiguen de froitos. Que os nosos rabaños crezan por millares nos campos

¹⁴e que os nosos bois cheguen cargados. Que non haxa invasión nin desterro, nin alarma nas nosas prazas.

¹⁵Benia o pobo a quen así lle vai, benia o pobo que ten a Deus por Señor.