Read Biblia SEPT Salmos 20 Bible Online

Salmos 20 - Biblia SEPT bible

Salmos 20

¹Do mestre do coro. Salmo de David.

²Que te escoite o Señor na hora do apuro, que te protexa o Deus de Xacob;

³que do santuario che mande socorro, que te sosteña desde Sión.

⁴Lembre as túas ofrendas, gústenlle os teus sacrificios;

⁵outórgueche o que queres, cumpra os teus proxectos.

⁶Que poidamos nós festexar a túa vitoria e no nome do noso Deus erguer as bandeiras: outórgueche o Señor canto lle pidas.

⁷Xa sei que o Señor lle dá a vitoria ó seu unxido, que lle responde desde o seu ceo santo coa forza liberadora da súa dereita.

⁸Uns confían nos seus carros, outros na súa cabalería; pero nós invocamos o Señor, noso Deus.

⁹Abanéanse eles e caen, mentres nosoutros nos erguemos e quedamos en pé.

¹⁰Dálle, Señor, a vitoria ó rei, escóitanos, cando te chamamos.