Read Biblia SEPT Salmos 24 Bible Online

Salmos 24 - Biblia SEPT bible

Salmos 24

¹Salmo de David. Do Señor é a terra e canto a enche, o orbe e canto nel habita.

²El é quen a fundou sobre os mares e quen a asegurou sobre as correntes.

³Quen poderá subir ó monte do Señor? Quen poderá quedar no seu santuario?

⁴O que ten as mans limpas e puro o corazón, o que non pon a mente en cousas vas e non xura nunca en falso.

⁵Ese recibirá do Señor bendición e xustiza de Deus, o seu salvador.

⁶Así é a liñaxe dos que o buscan, dos que buscan a presenza do Deus de Xacob.

⁷Erguede, portas, os linteis, alzádevos, antigos portais, para que entre o rei da gloria.

⁸Quen é ese rei da gloria? O Señor, forte e valente, o Señor, valente nas batallas.

⁹Erguede, portas, os linteis, alzádevos, antigos portais, para que entre o rei da gloria.

¹⁰Quen é ese rei da gloria? O Señor dos exércitos, El é o rei da gloria.