Read Biblia SEPT Salmos 26 Bible Online

Salmos 26 - Biblia SEPT bible

Salmos 26

¹De David. Faime xustiza, Señor, pois a miña conduta é inocente. Confío no Señor, e non esvararei.

²Examíname, Señor, e ponme á proba, esculca o meu interior e o meu corazón.

³Teño ante os ollos a túa misericordia e ando na túa verdade.

⁴Non me paro con xente falsa, nin me xunto cos hipócritas;

⁵Aborrezo a reunión dos malfeitores, e non sento cos impíos.

⁶Purifico, Señor, as miñas mans e dou voltas arredor do teu altar,

⁷proclamando a túa loanza, contando as túas marabillas.

⁸Amo, Señor, a casa onde moras, o lugar onde habita a túa gloria.

⁹Non xuntes a miña alma cos pecadores, a miña vida coa xente sanguinaria,

¹⁰que leva o crime nas mans, chea de suborno a súa dereita.

¹¹A miña conduta é inocente. Sálvame; ten compaixón de min.

¹²O meu pé mantense en bo camiño; nas asembleas bendigo ó Señor.