Read Biblia SEPT Salmos 29 Bible Online

Salmos 29 - Biblia SEPT bible

Salmos 29

¹Salmo de David. Tributádelle ó Señor, fillos de Deus, tributádelle ó Señor honor e forza;

²tributádelle ó Señor o honor do seu nome, adorade ó Señor con ornamento sagrado.

³Unha voz: "O Señor sobre as augas, o Deus glorioso fai tronar, o Señor sobre as moitas augas".

⁴Unha voz: "O Señor no seu poder". Unha voz: "O Señor na súa maxestade".

⁵Unha voz: "O Señor tronza os cedros, tronza o Señor os cedros do Líbano;

⁶fai choutar, coma un becerro, o Líbano, o Sirión coma un antílope".

⁷Unha voz: "O Señor fai lostregar".

⁸Unha voz: "O Señor estarrece o deserto, estarrece o Señor o deserto de Cadex".

⁹Unha voz: "O Señor retorce os carballos e arrinca os arboredos. No seu santuario todo di: Gloria!

¹⁰O Señor pon o asento sobre as augas, pon asento de rei eterno.

¹¹O Señor dálle forza ó seu pobo, o Señor bendí ó seu pobo coa paz".