Read Biblia SEPT Salmos 30 Bible Online

Salmos 30 - Biblia SEPT bible

Salmos 30

¹Salmo, canto da dedicación do templo do Señor. De David.

²Eu lóote, Señor, que me liberas e non deixas que o inimigo faga riso de min.

³Señor, meu Deus, eu suplico, e ti sándasme;

⁴sácasme do abismo e mantesme na vida, lonxe dos que baixan ó sepulcro.

⁵Cantádelle ó Señor os seus amados, loade o seu santo nome.

⁶O seu asaño dura só un intre; o seu favor, toda a vida. Se hai pranto á tardiña, ó abrente xa hai ledicia.

⁷Eu digo ben seguro: —"Nunca perecerei".

⁸O teu favor, Señor, sostén a miña forza; pero se ocultas o rostro, quedo conturbado.

⁹Por ti chamo, Señor, ó meu dono suplico.

¹⁰Que gañas ti coa miña morte e con que eu baixe ó sepulcro? Ou é que pode loarte o po e proclamar a túa fidelidade?

¹¹Escoita, Señor; ten compaixón de min, se ti, Señor, a miña axuda.

¹²Ti podes trocar o loito en danza, espirme do saco e vestirme de festa,

¹³para que o meu peito che cante, sen calar. Señor, meu Deus, por sempre te hei loar.