Read Biblia SEPT Salmos 33 Bible Online

Salmos 33 - Biblia SEPT bible

Salmos 33

¹Alegrádevos, xustos, no Señor: ós rectos acáelles a loanza.

²Festexade ó Señor con cítolas, tocade con arpa de dez cordas.

³Cantádelle unha nova cántiga, tanxédelle ben, con aturuxos.

⁴A palabra do Señor é recta e todas as súas obras son leais:

⁵El quere o dereito e a xustiza, a súa misericordia enche a terra.

⁶Pola palabra do Señor foron feitos os ceos, polo alento da súa boca todos os astros.

⁷Xuntou, coma nun fol, a auga do mar, meteu en depósitos o océano.

⁸Adore ó Señor a terra enteira, estremézase diante del a poboación do orbe,

⁹pois falou El, e existiron, mandouno El, e xurdiron.

¹⁰O Señor estraga o consello das nacións, desbarata os designios dos pobos.

¹¹O consello do Señor dura por sempre, os seus plans de xeración en xeración.

¹²Feliz a nación que ten a Deus por Señor, o pobo que El elixiu como herdade.

¹³Desde o ceo mira o Señor, olla para todos os homes;

¹⁴desde a súa morada observa a todos os habitantes da terra.

¹⁵El modelou o corazón de todos eles e esculca as súas obras.

¹⁶Non os moitos soldados lle dan a vitoria ó rei nin é a moita forza a que salva ó guerreiro;

¹⁷engano é a cabalería para a vitoria, un grande exército non é a salvación.

¹⁸Os ollos do Señor miran polos seus fieis, polos que esperan na súa misericordia,

¹⁹para librar a súa vida da morte, para os manter no tempo da miseria.

²⁰Nós agardamos o Señor: El é o noso socorro, o noso escudo.

²¹Nel alégrase ó noso corazón e confiamos no seu nome.

²²Veña a nós, Señor, a túa misericordia, como de ti o esperamos.