Read Biblia SEPT Salmos 34 Bible Online

Salmos 34 - Biblia SEPT bible

Salmos 34

¹De David. Cando se finxiu louco diante de Abimélec e marchou despedido.

²Eu bendigo ó Señor en todo instante, teño sempre na boca a súa loanza;

³gloríome no Señor, e os humildes alégranse, ó escoitalo.

⁴Exaltade comigo ó Señor, loemos xuntos o seu nome.

⁵Eu busco ó Señor, e El responde, líbrame de todos os temores.

⁶Ollade para El e refulxide, non poñades caras murchas.

⁷O Señor escoita ó pobre que o chama e líbrao de todos os apuros.

⁸O anxo do Señor acampa en torno ós seus fieis e dálles seguridade.

⁹Gustade e vede que bo é o Señor: feliz quen a El se acolle.

¹⁰Temede ó Señor os seus devotos, pois nada lles falta ós que o temen.

¹¹Empobrecen os ricos, pasan fame, pero ós que buscan ó Señor ningún ben lles faltará.

¹²Vinde, fillos; escoitade: ensinareivos o temor do Señor.

¹³Quen ama a vida e arela días de prosperidade?

¹⁴Garda a túa lingua do mal, os teus labios de falas enganosas.

¹⁵Arrédate do mal e fai o ben, busca a paz, corre tras ela.

¹⁶Os ollos do Señor están cara ós xustos, os seus oídos cara ó seu clamor;

¹⁷mais o Señor mira con enfado ós malvados, para borrar da terra a súa memoria.

¹⁸Claman aqueles, e o Señor escoita, líbraos de todas as angustias.

¹⁹O Señor está preto do aflixido, salva ó asoballado.

²⁰Moitos son os males dos xustos, pero de todos os libra o Señor.

²¹El coida dos seus ósos, nin un só romperán.

²²A maldade mata ó impío; quen aborrece os xustos será castigado.

²³O Señor redime os seus servos: non será castigado quen a El se acolle.