Read Biblia SEPT Salmos 36 Bible Online

Salmos 36 - Biblia SEPT bible

Salmos 36

¹Do mestre do coro. De David, servo do Señor.

²Unha sentencia de culpa contra o impío levo no corazón. O temor de Deus non conta ós seus ollos,

³gábanse de non atopar en si maldade que aborrecer.

⁴Os ditos da súa boca son malignos e falsos, deixou de entender e de facer o ben.

⁵No seu leito remoe na maldade, teima no mal camiño, non ten repugnancia do mal.

⁶A túa misericordia, Señor, alcanza o ceo, a túa fidelidade chega ás nubes.

⁷A túa xustiza é alta coma os montes, os teus xuízos son fondos coma o mar. Ti, Señor, socorres a homes e animais.

⁸Que precioso, Deus, é o teu amor! Os humanos acóllense á sombra das túas ás,

⁹fártanse coa abundancia da túa casa. Ti dáslles a beber do río das túas delicias,

¹⁰pois está en ti a fonte da vida, e a túa luz fai que vexamos nós a luz.

¹¹Alonga o teu favor ós que te recoñecen, a túa providencia ós rectos de corazón.

¹²Que os pés do soberbio non me atrapen, que non me mova a man do impío.

¹³Alá caen xa os malfeitores, e, caídos, non poden máis erguerse.