Read Biblia SEPT Salmos 38 Bible Online

Salmos 38 - Biblia SEPT bible

Salmos 38

¹Salmo de David, en lembranza.

²Señor, non me reprendas con ira, non me corrixas con noxo.

³As túas frechas espetáronse en min, sobre min descende a túa man.

⁴Non hai membro san no meu corpo por mor da túa indignación; non hai sosego para os meus ósos, por causa do meu pecado.

⁵As miñas culpas sóbenme á cabeza, coma carga que non podo aturar;

⁶As miñas chagas feden e deitan pus, por culpa dos meus erros.

⁷Ando encollido, derreado, sombrizo, todo o día.

⁸Os meus riles están cheos de quentura, non hai no meu corpo membro san.

⁹Estou esgotado, de todo deprimido, bruando cos bramidos do meu peito.

¹⁰Todas as miñas ansias, Señor, che están presentes, os meus suspiros non se che esconden.

¹¹O meu corazón palpita, as forzas abandónanme e mesmo me falta a luz dos meus ollos.

¹²Amigos e compañeiros foxen das miñas chagas, os meus parentes quédanse ó lonxe.

¹³Os que atentan contra a miña vida tenden lazos, os que buscan o meu mal falan de ruína e traman traizón todo o día.

¹⁴Pero eu son coma xordo que non oe, coma mudo que non abre a súa boca.

¹⁵Son coma o que non oe e non ten resposta que dar.

¹⁶En ti, Señor, confío, e ti responderás, Señor, meu Deus.

¹⁷Eu pido: —"Non se rían á miña conta, non me asoballen, se esvara o meu pé".

¹⁸Porque, en verdade, estou para caer, e a miña dor sempre comigo.

¹⁹Eu confeso a miña culpa, inquiétame o meu pecado.

²⁰Os inimigos da miña vida son potentes; son moitos os que me odian sen razón;

²¹os que volven mal por ben sonme hostís, por buscar eu o ben.

²²Non me abandones ti, Señor, non esteas lonxe, meu Deus.

²³Dáte présa a axudarme, Señor, a miña salvación.